རྩོམ་པ་པོ། སྟོང་དཔོན་བསོད་ནམས་ཡར་འཕེལ།
མདོ་སྨད་ཆོས་འབྱུང་སོགས་སུ་གསལ་བའི་ལོ་ཆེན་བཻ་རོ་ཙ་ནའི་སྒྲུབ་ཕུག་མཇལ་བར་འབར་ཁམས་ནས་ཅོག་ཙེ་བརྒྱུད་དེ་སོ་མང་ཆུ་བོའི་བྱང་ཕྱོགས་ལ་སྤྱི་ལེ་བཅུ་གསུམ་ཙམ་ཡོད་པར་སོང་པ་ཡིན།སྒྲུག་ཕུག་གི་ལ་རྩར་ཐོན་དུས་ལམ་མགོ་གཉིས་སུ་གྱེས་ཡོད་ལ།གོང་མ་དེ་གཞུང་ལམ་ཡིན་ལ།འོག་མ་དེ་རྐང་ལམ་རེད།ཕྲན་ནི་རྐང་ལམ་བརྒྱུད་དེ་སྒྲུབ་ཕུག་མཇལ་དུ་སོང་པ་ཡིན།དེང་སྐབས་ལམ་ཕྲན་དེར་ཞུགས་ཏེ་བགྲོད་མཁན་ཉུང་ཉུང་ཡིན་པས།རྩི་ཤིང་མང་པོ་ལམ་འགྲམ་དུ་སྐྱེས་ཤིང་རི་དྭགས་འདྲ་མིན་གྱི་གནས་ཚང་ཡོད་པར་དོགས་ཚེར་ཆེན་པོ་རེ་གློ་བར་དུ་མི་འབྱུང་རང་དབང་ཞིག་མེད་ཐལ།མགྱོགས་མྱུར་དུ་སྒྲུབ་ཕུག་གི་ཕྱོགས་ལ་འགྲོ་ཅི་ཐུབ་གང་ཐུབ་བགྱིས་ཏེ་དུས་ཚོད་གཉིས་དང་ཕྱེད་ཡས་མས་སུ་རི་མགོ་ལ་ཐོན་ཐུབ་སོང་བས།སེམས་ངལ་ཆེན་པོ་ཞིག་གསོས་ཏེ་རི་སྐོར་དུ་སོང་པ་ཡིན།
རི་སྐོར་དུ་སོང་ཚེ་རི་སྐོར་ལ་འགྲོ་སྐབས་ཀྱི་མཉམ་འཇོག་དགོས་ས་རྣམས་གསལ་བཤད་ཐུང་ཐུང་ཞིག་ཡོད་ལ།ལམ་བར་དུ་བསང་ཁྲི་ཞིག་འདུག་པས་དེར་མྱི་མང་པོས་ཁ་འབོད་བྱས་ཏེ་བསང་གཏོང་གྱིན་ཡོད་ཅིང་།གྲྭ་པ་རྒན་པ་ཞིག་གི་སྐོར་བ་བྱེད་པ་དང་ཕྲད་པས་ཁོང་ལ་འཚམས་འདྲི་ཞུས་པ་ཡིན།ཁོང་གིས་ང་ལ་བསང་ཁྲིའི་འགྲམ་དུ་གཡུ་སྒྲ་སྙིང་པོའི་དབུ་ཞྭ་རང་བྱོན་ཞིག་མཇལ་རྒྱུ་ཡོད་པས།རླུང་རྟ་ཕར་ཕྱགས་དང་ཟེར།དེ་ནས་རླུང་རྟ་རྣམས་ཕར་བསལ་ཏེ་གཡུ་སྒྲ་སྙིང་པོའི་དབུ་ཞྭ་མཐོང་བྱུང་བས་སེམས་སུ་ཚོར་སྣང་སྐྱིད་པོ་རེ་འཆར་ཞོར་དུ་འཁོར་ཡུག་འབོག་བཙོག་གི་ཉེས་དམིགས་ཤིག་དངོས་སུ་མཐོང་བྱུང་བས།སྤྱིར་རླུང་རྟ་མཆོད་ན་ཡག་མོད།གང་འདོད་འདོད་དུ་མཆོད་ན་འཁོར་ཡུག་གཙང་སྒྲ་ལ་གནོད་པ་མ་ཟད།ཆོས་ཀྱིས་བར་ཆེད་དུ་འགྲོ་བར་དོགས་ཏེ་སྔར་མཆོད་མཇལ་པ་མང་པོ་སླེབས་རུང་གཡུ་སྒྲའི་དབུ་ཞྭ་རང་བྱོན་མཇལ་མ་ཐུབ་པར་ལས་འདུག།དེ་དག་ནི་རླུང་རྟ་དང་ཀུན་སྤྱོད་ཀྱིས་བསྐྲུན་པའི་ནག་ཉེས་ཡིན་པར་སྣང་།
རི་བོ་ཆུང་ཆུང་ཞིག་ལ་སྐོར་བ་བྱེད་གྱིན་འདུག་པས་དེ་ཅི་རེད་ཅེས་དྲིས་པར་དེ་གཡུ་སྒྲ་སྙིང་པོའི་བཀའ་གཏེར་དུ་སྦས་གནས་ཡིན།གཏེར་གནས་དེ་སྐོར་ནས་མདུན་ཕྱོགས་ལ་ཐོན་ཚེ་རྒྱུད་དུ་མར་ལམ་ཕྲན་དོག་མོ་ཞིག་འདུག་པས།དེ་བརྒྱུད་ནས་མར་ཅུང་ཙམ་སོང་སྟེ་གཡས་ཕྱོགས་སུ་སོང་ན་གཡུ་སྒྲ་སྙིང་པོའི་སྒྲུབ་ཕུག་ཡོད།སྒྲུབ་ཕུག་ནང་ལ་འགྲོ་དགོ་དུས་མི་ཞིག་རྒྱུད་རྒྱུད་ལ་ཡར་ནང་དུ་སོང་ཚེ་ཐོན་ཐུབ་ཅིང་།ནང་དུ་མི་ཞིག་བཞུགས་ཏེ་སྒོམ་སྒྲུབ་བྱས་ན་ཉམས་རྟོགས་འཕེལ་བར་འདོད་པ་ཞིག་རེད།ད་སྐོར་ནང་དུ་གུ་རུའི་སྐུ་ཞིག་དང་ཁྲི་སྲོང་གི་སྐུ་ཞིག་རྟེན་དུ་གནས།གཡུ་སྒྲའི་སྒྲུབ་ཕུག་མཇལ་ཚར་དུས་ཡང་བསྐྱར་སྔར་གྱི་ལམ་ཕྲུན་དེ་བརྒྱུད་ནས་སོང་ཙ་ན་བཻ་རོ་ཙ་ནའི་འོད་གསལ་སྒྲུབ་ཕུག་གི་མདུན་དུ་ཐོན་ཐུབ།བཻ་རོའི་འོད་གསལ་སྒྲུབ་ཕུག་ན་ཁོང་གི་སྐུ་ཡོངས་རྫོགས་ཀྱི་རྗེས་རྣམས་རང་བྱོན་དུ་ཡོད་ལ།ཕྱག་རྟེན་དང་གཏེར་ཆུ་རྣམས་ཀྱང་མཇལ་རྒྱུ་འདུག།འོད་གསལ་སྒྲུབ་ཕུག་ནས་ཕར་འགྲོ་དུས་རི་སྐོར་རྐང་ལམ་ནི་བྲག་དམར་བོའི་ནང་ལ་སྐས་བཙུགས་ཏེ་ཕར་སྐོར་བར་འགྲོ་དགོས་པའི་འཇིགས་སྐྲག་སྐྱེས་ཞོར་དུ་རི་སྐོར་ལ་ཕར་ཏོག་ཙམ་སོང་བས་རི་སྐོར་དེ་མཇུག་གྲུབ་སོང་།
གནས་འདི་རུ་ཐོས་བསམ་སྒོམ་བྱས་པའི་སྐྱེས་ཆེན་ནི་ཡོད་དེ།མདོ་སྨད་ཆོས་འབྱུང་ལས།ཅོག་ཙེ་ལ་འགྲོ་ལམ་དུ་སློབ་དཔོན་བཻ་རོའི་སྒྲུབ་ཁང་དུ་སྐུ་ཡོངས་རྫོགས་ཀྱི་རྗེས་སོགས་རང་བྱོན་མང་། རྒྱལ་དབང་དྲུག་པ་ཚངས་དབྱངས་རྒྱ་མཚོ་ཕེབས་ནས་རེ་ཞིག་བཞུགས་པར་གྲགས། བར་སྐབས་ཤིག་ནས་སེམས་དཔའ་ཆེན་པོ་བཀྲས་ལྷུན་བློ་བཟང་འཇམ་དཔལ། བོན་གྱི་ལྟ་བ་དོར་ནས་དགེ་ལྡན་རིང་ལུགས་འཛིན་པ་འབྲས་སྤུངས་ཡེ་ཤེས་ཡར་འཕེལ། སྒྲོལ་མས་འཇིགས་པ་ལས་བསྐྱབས་ཤིང་། པདྨ་ཧེ་རུ་ཀ་གྲུབ་པ་ཕོར་མཁན་བླ་མར་གྲགས་པའི་རྙིང་མ་པ་སྟེ་གསུམ་དགེ་སྦྱོར་ལ་ཡུན་རིང་གཞོལ། སྔ་མ་གཉིས་ཀྱི་དྲིན་ལས་ཕྱོགས་འདིར་སྨྱུང་གནས་ཀྱི་སྲོལ་དར།ཞེས་དང་།ཨ་ལགས་དམུ་དགེ་བསམ་གཏན།གཡུ་སྒྲ་སྙིང་པོ་སོགས་སྐྱེས་ཆེན་དམ་པ་མང་པོ་བཞུགས་ཡོད་པ་མ་ཟད།དེང་སྐབས་ཀྱང་སྒྲུབ་ཕུག་དེར་གྲྭ་པ་མི་ཉུང་པ་ཞིག་བཞུགས་ཡོད་ལ།སྒོམ་སྒྲུབ་ཀྱང་ཁྱེད་མཚར་ཡོད་པར་སེམས་ཏེ་སེམས་སུ་དད་པ་དང་མོས་གུས་སྐྱེས་ཞོར་དུ་བཻ་རོ་ཙ་ནའི་ཐུགས་ཀྱི་སྲས་ཀྱི་ཆོག་དམ་པ་གཡུ་སྒྲ་སྙིང་པོའི་མཛད་སྤྱོད་སྙིང་བསྡུས་ཤིག་འབྲིར་མོས་སོང་།
རྒྱལ་མོ་གཡུ་སྒྲ་སྙིང་བོ་ནི་སྤྱི་ལོ༧༦༣ལོར་རྒྱལ་མོ་ཚ་བ་རོང་ཇོ་ཚོ་ཙོའི་ཏ་བརྟན་མགོའི་མགོ་དཔོན་གྱི་ཁྱིམ་རྒྱུད་དུ་འཁྲུངས་ཤིང་།རང་ལོ་བརྒྱད་པ་ནས་བཟུང་ཡུལ་ཁམས་གང་སར་འགྲིམས་སྐབས་ཆུ་ཆེན་དུ་སླེབས་པ་དང་བཻ་རོ་ཙ་ནར་མཇལ་ཏེ་བླ་མར་བསྟེན།བཻ་རོས་བྱང་ཆུབ་ནམ་མཁའ་བྱ་བས་དཔེ་ཁྲིད་གནང་སྐབས།གཡུ་སྒྲ་སྙིང་བོ་བློ་རིག་མྱུར་ཞིང་ཤེས་རབ་རྣོ་བས་བླ་མས་ཅི་གསུངས་ཁོང་དུ་ཆུད།དེ་ནས་གཡུ་སྒྲ་སྙིང་པོ་བཻ་རོས་དངོས་སློབ་ཏུ་གྱུར།ཕྱིས་གཡུ་སྒྲ་སྙིང་པོས་བླ་མར་ཡིག་སྒྱུར་གྱི་ལས་རོགས་ཞུས།བཻ་རོ་དང་མཉམ་དུ་རྒྱ་གར་ལ་སློབ་གཉེར་དུ་ཕེབས།སྤྱི་ལོ༧༨༤ལོར་བོད་དང་རྒྱ་གར་གྱི་མཁས་དབང་ལྷན་དུ་འཛོམས་པའི་དབུས་སུ་གཞུང་ལུགས་ཀྱི་དཀའ་གནས་རྩོད་སྐབས་འགྲན་ཟླ་དང་བྲས་སྟབས་མཚན་སྙན་སྔར་ལས་རྒྱས་པ་ཡིན།དེ་ནས་རྒྱལ་བློན་མང་པོའི་ལྷ་ཆོས་ཞུ་ཡུལ་དུ་གྱུར།
སྤྱི་ལོ༨༤༦ལོར་ཡུལ་དབུས་སུ་མྱ་ངན་ལས་འདས།དགུང་གྲངས་བརྒྱ་དང་གསུམ་ལ་བཞུགས།རྒྱལ་མོ་ཚ་བ་རང་གི་ཚོང་བ་ཁག་ཅིག་གིས་ཁོང་གི་གདུང་རུས་དང་དབུ་རྒྱན་སོགས་མདོ་སྨད་དུ་གདན་འདྲེན་ཞུས་ཏེ།རྫི་འགག་ནོར་བུ་གླིང་དགོན་པར་ཕུལ་ཅིང་།རིག་གསར་སྐབས་སུ་དགོན་པར་གཏོར་བརླགས་སོང་སྟེ།ད་ལྟ་ནི་འབྱུང་བ་ནམ་མཁའི་ཁམས་ལ་ཐིམ་པ་བཞིན་ཡིན་ནམ་སྙམ།ཁོང་གི་མཚན་གཞན་ལ་ཀུན་དགའ་སྙིང་བོ་ཟེར།
༢༠༡༨/༢/༣ཉིན་མདོ་སྨད་བཻ་རོ་ཙ་ནའི་འོད་གསལ་སྒྲུབ་ཕུག་ཏུ་མགྱོགས་བྲིས་སུ་བགྱིས།
Leave a Reply