མཁན་ཆེན་ཀུན་དགའ་དབང་ཕྱུག་རིན་པོ་ཆེ་མཆོག་གི་གསུང་འབུམ་བོད་སྡེ་དགེ་རྫོང་གསར་ཁམས་བྱེ་ལྔ་རིག་ཐུབ་བསྟན་སློབ་གླིང་ནས་ཕྱོགས་བསྒྲིགས་དང་ཁྱབ་སྤེལ་བྱས།
མཛད་པ་པོ་ངོ་སྤྲོད་མདོར་བསྡུས།
མཁན་ཆེན་ངག་དབང་ཀུན་དགའ་དབང་ཕྱུག་མཆོག་ནི། སྤྱི་ལོ་༡༩༢༡རབ་བྱུང་བཅོ་ལྔའི་རབ་གནས་ལྕགས་བྱ་ལོར་ཁམས་སྡེ་དགེ་མདོ་སྨད་ལྷུན་གྲུབ་སྟེང་དུ་སྐུ་བལྟམས། ༡༩༣༩རབ་བྱུང་བཅུ་བདུན་ས་ཡོས་ལོར། མཁན་པོ་བཟོད་པ་ལེགས་བཤད་ཀྱི་ཞལ་སྔ་ནས་དགེ་ཚུལ་གྱི་སྡོམ་པ་དང་། ༡༩༤༠ལོར་ངོར་ཨེ་ཝཾ་ཆོས་ལྡན་དུ་ཐར་རྩེ་མཁན་རིན་པོ་ཆེ་བྱམས་པ་ནམ་མཁའ་ཀུན་བཟང་བསྟན་པའི་རྒྱལ་མཚན་གྱི་ཞལ་སྔ་ནས་བསྙེན་རྫོགས་དང་ལམ་འབྲས་བུ་དང་བཅས་པའི་གདམས་ངག་ཟབ་མོ་མནོས། ༡༩༤༣ལོར་ཁམས་བྱེའི་རྫོང་སར་བཤད་གྲྭར་མཁན་རིན་པོ་ཆེ་མདོ་སྲིབ་ཐུབ་བསྟན་རྒྱ་མཚོའི་ཉེ་གནས་དང་། གསན་སྦྱོང་ཆེད་དུ་ཕེབས། ༡༩༤༢ནས་༡༩༥༠ཐམ་པའི་བར་མཁན་རིན་པོ་ཆེ་ཐུབ་བསྟན་རྒྱལ་མཚོ་དང་ལུས་དང་གྲིབ་མ་བཞིན་འགྲོགས་ཤིང་། འཆད་ཉན་ཉམས་ལེན་གྱི་རྒྱུན་གཟིགས་སོ་ཅོག་གསན་སྦྱོང་མཛད། ༡༩༤༥ལ་རྫོང་སར་བཤད་གྲྭའི་སྐྱོར་དཔོན་དུ་འདེམས་བསྐོས་བྱུང་ནས་སྐྱོར་དཔོན་ལོ་ལྔ་ལ་གནང་། ༡༩༥༠མཁན་རིན་པོ་ཆེ་ཐུབ་བསྟན་རྒྱ་མཚོའི་བཀའ་བཞིན་མདོ་སྲིབ་དགོན་གྱི་འགན་འཛིན་དང་མཁན་པོ་ལོ་བཞི་དང་། ༡༩༥༥ལོར་རྡོ་རྗེ་འཆང་ཆོས་ཀྱི་བློ་གྲོས་ཀྱི་བཀའ་བཞིན་ཝ་རྭ་དགོན་གི་བཤད་གྲྭའི་མཁན་པོ་ལོ་གསུམ་མཛད། ཕྱིས་སུ་འཇམ་དབྱངས་མཁེན་བརྩེ་ཐུབ་བསྟན་ཆོས་ཀྱི་རྒྱ་མཚོའི་བཀའ་ལྟར། སྤྱི་ལོ༡༩༨༣རབ་བྱུང་༡༦ཆུ་ཕག་ལོའི་ཆོ་འཕྲུལ་ཟླ་བའི་ཚེས་བཅོ་ལྔ་ཉིན་རྫོང་སར་བཤད་གྲྭའི་དབུ་བཙུགས། རྗེ་དགུང་གྲངས་གྱ་བརྒྱད་བཞེས་པ་༢༠༠༨སྤྱི་ཟླ་༥པའི་ཚེས་༢༥ཉིན་ལ་དགོངས་པ་ཆོས་དབྱིངས་སུ་ཐིམ།
གསུང་འབུམ་ངོ་སྤྲོད་མདོར་བསྡུས།
ཉེ་ཆར། རྫོང་སར་ཁམས་བྱེའི་ལྔ་རིག་ཐུབ་བསྟན་སློབ་གླིང་གིས་བསྒྲིགས་ཤིང་ངེད་སི་ཁྲོན་མི་རིགས་དཔེ་སྐྲུན་ཁང་གིས་དཔེ་སྐྲུན་འགྲེམ་སྤེལ་བྱས་པའི་མཁན་ཆེན་ཀུན་དགའ་དབང་ཕྱུག་གི་གསུང་འབུམ་པོད་བཅུ་གསུམ་གྱི་བདག་ཉིད་ཅན་འདི་ཉིད་རྒྱ་ཆེའི་ཀློག་པ་པོ་ཡོངས་ཀྱི་བསོད་ནམས་ཀྱི་བགོ་སྐལ་དུ་ཕུལ་ཡོད། གསུང་འབུམ་འདིར་བདག་ཅག་གི་སྟོན་པས་ཐུགས་བསྐྱེད་ཚུལ་གྱི་སྐྱེས་རབས་མདོར་བསྡུས་དང་། མཛད་པ་བཅུ་གཉིས་ཀྱི་རྣམ་བཤད་ཐར་བའི་སྒོ་འབྱེད། རྒྱན་དྲུག་མཆོག་གཉིས་ཀྱི་རྣམ་ཐར། སྤྱོད་འཇུག་གི་འགྲེལ་པ། ཤེར་ཕྱིན་གྱི་མན་ངག་གི་བསྟན་བཅོས་མངོན་པར་རྫོགས་པའི་རྒྱན་འགྲེལ། སོ་སོར་ཐར་པའི་མདོའི་ཚིག་དོན་ཅུང་ཟད་འགྲེལ་པ། མངོན་པ་མཛོད་ཀྱི་ཚིག་དོན་ཉུང་གསལ་བསྡུས་ཏེ་འགྲེལ་པ་དབྱིག་གཉེན་དགོངས་རྒྱན། 
ཚད་མ་རྣམ་འགྲེལ་དང་ཀུན་བཏུས་སོགས་ཀྱི་མཆན་འགྲེལ། ད་དུང་གཞུང་འགྲེལ་གྱི་ཚོམས་དང་། ཉམས་ལེན་གྱི་ཚོམས། ཟིན་བྱིས་ཀྱི་ཚོམས་སོགས་ཀྱིས་མཚོན་ལེགས་པར་བཤད་པའི་ཚོགས་ཇི་སྙེད་ཅིག་བཞུགས་པ་འདི་དག་ནི་མཁས་དང་གྲུབ་པ་འདོད་པ་རྣམས་ལ་རིགས་པ་དང་མན་ངག་གི་གཏེར་མཛོད་དུ་ངེས་ཤིང་། ལྷག་པར་དགག་བཞག་དང་མཁས་ཁྱད་ཀྱི་སྤྲོས་པ་བསྐྱུངས་ཤིང་གདུལ་བྱའི་བློ་གྲོས་དང་འཚམས་པར་བརྩམས་པ་ཤ་སྟག་ཏུ་སོང་བས་ཁ་གསལ་ལ་གོ་བདེ་བ། མཁས་བླུན་སུས་བལྟས་ཀྱང་རིན་ཐང་བྲལ་བའི་གཞུང་ལུགས་དང་མན་ངག་གི་གཏེར་མཛོད་འབའ་ཞིག་ཏུ་མཆིས་སོ། །
གདོང་མཁན་རིན་པོ་ཆེ་ལགས་གསར་འགྱུར་སོགས་དུས་ཐོག་ཏུ་སྤེལ་བར་བཀའ་དྲིན་ཆེ།
གདོང་མཁན་རིན་པོ་ཆེ་ལགས་ཁྱེད་ཀྱིས་གསར་འགྱུར་དང་རྩོམ་རིག་སོགས་དུས་ཐོག་ཏུ་སྤེལ་གནང་བར་བཀའ་དྲིན་ཆེ།