ཕྱི་ལོ་ ༢༠༡༨ ལོའི་ཕྱི་ཟླ ༤ པའི་ནང་དུ། མདོ་ཁམས་རྫ་རྒྱུད་ས་སྐྱ་དགོན་བརྩེ་ཆེན་བཤད་སྒྲུབ་ཆོས་འཁོར་གླིང་གི་བཤད་གྲྭ་བཀྲ་ཤིས་བརྩེ་ཆེན་གླིང་དུ་བོད་ཡིག་ཡིག་གཟུགས་ཆེད་སྦྱོང་འཛིན་གྲྭ་ཐེངས་དང་པོ་བསྡུས་ཡོད་པ་རེད། 
དེ་ཡང་དགོན་འདིའི་བསྟན་པའི་བདག་པོ་མཆོག་སྤྲུལ་རིན་པོ་ཆེ་ངག་དབང་སངས་རྒྱས་འཕྲིན་ལས་བསྟན་པའི་རྒྱལ་མཚན་མཆོག་ནས་བླ་ན་མེད་པའི་ཐུགས་ཁུར་དང་ཕྱི་ནང་གི་མཐུན་རྐྱེན་ཡོངས་རྫོགས་སྐྲུན་གནང་མཛད་པ་ལ་བཅས་ལ་བརྟེན་ནས། ད་ཐེངས་ཀྱི་མཛད་རིམ་འདི་ཡོངས་སུ་ཕུན་སུམ་ཚོགས་པའི་ངང་ནས་གྲུབ་ཡོད་ཅིང་། མ་འོངས་པར་ཡང་ཡིག་གཟུགས་ཆེད་སྦྱོང་གི་འཛིན་གྲྭ་འདི་རྒྱུན་འཐུད་ནས་སྤེལ་རྒྱུའི་འཆར་གཞི་ཡོད་པ་རེད། ཐེངས་འདིར་ཆེད་དུ་གདན་ཞུས་བྱས་པའི་བྲིས་དགེ་ཤང་ཐོ་དགོན་གྱི་བླ་མ་རིག་འཛིན་ཕུན་ཚོགས་སམ་ངག་དབང་བསྟན་འཕེལ་མཆོག་ནི། བསྟན་པ་ཡང་དར་གྱི་དུས་སུ་གངས་ཅན་ཡིག་གཟུགས་ཀྱི་བསྟན་པ་སྤེལ་བ་ལ་འགྲན་ཟླ་དང་བྲལ་བ་ལྷོ་སྲིབ་མདའ་སྤྲུལ་སྐུ་ཨོ་རྒྱན་བསྟན་འཛིན་གྱི་དངོས་སློབ་ཡིན་ཞིང་། ཁོང་གི་བྲིས་རྒྱུན་ནི། བསྟན་པ་ཕྱི་དར་གྱི་ཐོག་མ་ཙམ་ན་བྱོན་པའི་ཡིག་མཁན་ཁྱུང་པོ་གཡུ་ཁྲིའི་ཕྱག་རྒྱུན་གཞིར་བཞག་ལ། སྡེ་དགེ་ཆོས་རྒྱལ་བསྟན་པ་ཚེ་རིང་དང་། སི་ཏུ་པཎ་ཆེན་ཆོས་ཀྱི་འབྱུང་གནས། ཞུ་ཆེན་ལོ་ཙ་བ་ཚུལ་ཁྲིམས་རིན་ཆེན་བཅས་ནས་རྒྱལ་བའི་བཀའ་འགྱུར་དང་བསྟན་འགྱུར་ངོ་མཚར་པར་གྱི་གཟུགས་སུ་བཀོད་དེ་སྡེ་དགེ་པར་ཁང་ཆོས་མཛོད་ཆེན་མོ་གསར་དུ་བཞེངས་པའི་སྐབས། བོད་ཆོལ་ཁ་གསུམ་གྱི་ཡིག་གཟུགས་མཁས་པ་ཡོངས་རྫོགས་བསྡུས་ནས་ལེགས་ཆ་རྣམས་ཕྱོགས་བསྡུས་བྱས་པ་དང་། སྒྲ་དབྱངས་ལྷ་མོ་དབྱངས་ཅན་མས་ཞུ་ཆེན་བྱིན་གྱིས་རླབས་པ་ལས་བྱུང་བའི་ཡིག་གཟུགས་བཅས་ཕྱོགས་གཅིག་ཏུ་སྡེབས་པ་ཞིག་ཡིན་ཏེ། དེ་ལྟར་བརྒྱུད་པའི་ཆུ་བོ་ཀུན་འདུས་ཤིང་། ལེགས་པའི་སྙིང་བཅུད་གོང་བུ་གཅིག་ཏུ་བྱས་པ་ལ། ཁྱད་ཆོས་ཀྱི་སྒོ་ནས་སྡེབས་བྲིས་སམ། ས་གནས་ཀྱི་སྒོ་ནས་སྡེ་བྲིས་སུ་གྲགས་པ་དེ་ཉིད། ཞེ་ཆེན་དྲུང་ཡིག་བསྟན་འཛིན་རྣམ་དག །ཞེ་ཆེན་དབོན་སྤྲུལ་པཎ་ཏྲི་ཏ་འགྱུར་མེད་མཐུ་སྟོབས་རྣམ་རྒྱལ། ལྷོ་ཨ་གྲོ་སྒྲ་རམས་པ་འགྱུར་མེད་རྣམ་པར་རྒྱལ་བ་སོགས་མཁས་པ་བར་མ་ཆད་པ་ལས་མཆོག་སྤྲུལ་ཨོ་རྒྱན་བསྟན་འཛིན་དང་དགེན་རིག་འཛིན་ཕུན་ཚོགས་ཀྱི་བར་དུ་མཐོང་བརྒྱུད་ཀྱི་ཕྱག་བཞེས་རྒྱུན་མ་ཆད་པ་ཡིན། དེས་ན་བརྒྱུད་པ་ཁུངས་ལ་ཐུག་ཅིང་། ཁྱད་ཆོས་འབུར་དུ་ཐོན་པའི་སློབ་དཔོན་དམ་པའི་ཞབས་པད་ལ་བསྟེན་རྒྱུ་བྱུང་ཞིང་། དེ་ལས་རིག་གནས་ཀྱི་བདུད་རྩི་མྱོང་བའི་སྐལ་བཟང་བྱུང་བ་ནི་དགའ་དད་སྤྲོ་གསུམ་སྐྱེ་འོས་དང་གཟི་བརྗིད་དང་སྤོབས་པའི་གནས་ཞིག་ཅི་ཕྱིར་མིན།
སྤྱིར་དེང་དུས་འཕྲུལ་གྱི་ལག་རྩལ་གོང་འཕེལ་ཚད་མཐོར་ཕྱིན་པར་བརྟེན་ནས་བོད་ཀྱི་སྐད་ཡིག་དར་སྤེལ་ལ་ཡང་ཕྱོགས་གཅིག་ནས་དགེ་ཕན་ཆེན་པོ་བྱུང་ན་ཡང་། ཕྱོགས་གཞན་ཞིག་ནས་ཡི་གེའི་གཟུགས་རིས་ཀྱི་རྨད་དུ་བྱུང་བའི་རིག་གནས་དག་ཉམས་རྒུད་ཀྱི་ལམ་དུ་བསྐྱོད་པར་ཉེ་བ་ལ་བརྟེན། ད་ལྟའི་ཆར་རིག་ཚན་འདི་སླར་གསོ་བགྱིད་པ་ལ་ཆེས་ཆེ་བའི་རིན་ཐང་དང་དགོས་གནད་ལྡན་ཡོད་པར་མ་ཟད། ལྷག་པར་ཁུངས་ལྡན་གྱི་བྲིས་རྒྱུན་སླར་གསོ་བྱེད་པ་ལ་དེ་ལས་ཀྱང་དགོས་གནད་ཆེན་པོ་དང་བཅས་པར་ཤེས་དགོས་སམ་ཡང་སྙམ་མོ།།
ཡོང་ཁུངས། བརྩེ་ཆེན་བཤད་སྒྲུབ།
དཔྱད་གཏམ་སྤེལ་མཁན་ལ་གསལ་བརྡ།