རྩོམ་པ་པོ། མཁན་པོ་ཆོས་དབྱིངས་རྡོ་རྗེ།
བདག་ཉིད་ཆེན་པོ་ཆོས་ཀྱི་རྗེས། །
འཕགས་པ་གསུམ་གྱི་རིང་བསྲེལ་ནི།།
ཡོན་ཏན་སྟོབས་ཀྱིས་འབྱུང་བ་སྟེ།།
ལུས་ཅན་རྣམས་ཀྱི་བསོད་ནམས་རྟེན།།
འབྱུང་ཁུངས་ལས་བྱུང་རིན་ཆེན་འདྲ།།
ཞེས་དང་མགོན་པོ་ཀླུ་སྒྲུབ་ཀྱིས།།
མཉམ་མེད་ཐུབ་པའི་བསྟོད་པ་རུ།།
ཡང་དག་ཉིད་དུ་འཇིག་མེད་ཀྱང་།།
མ་འོངས་སེམས་ཅན་བསོད་ནམས་གཞིར།།
རིང་བསྲེལ་མང་དུ་སྤྲུལ་ཞེས་ལྟར།།
ཚུལ་ཁྲིམས་དག་པས་ལུང་ངག་གཙང་།།
ཤེས་རབ་དག་པས་ལུང་རིགས་མཁས།།
ལྷག་བསམ་དག་པས་གཞན་ཕན་བརྩོན།།
མདོར་ན་མདོ་རྒྱུད་བསྟན་བཅོས་ལས།།
གསུངས་པའི་བླ་མའི་མཚན་ཉིད་ཀུན།།
འགྲན་པ་བཞིན་དུ་འདུས་པ་ཡི།།
ངག་དབང་ཀུན་དགའ་དབང་ཕྱུག་གིས།།
མ་འོངས་སེམས་ཅན་བསོད་ནམས་རྟེན།།
བཞག་པའི་ཚེམས་ཀྱི་རིང་བསྲེལ་རྣམས།།
བདག་སོགས་སློབ་བུའི་རྣམ་དཀར་གྱིས།།
ཉེ་བར་དྲངས་ནས་མི་རིང་བར།།
མགོན་པོ་གང་གི་གདན་སའི་མཐིལ།།
འཕགས་ཡུལ་རྫོང་སར་བཤད་གྲྭ་རུ།།
མྱུར་དུ་འབྱོར་བའི་གསལ་བསྒྲགས་འདི།།
དགའ་དད་སྤྲོ་བ་ཆེན་པོ་ཡིས།།
འཕྲིན་ཕྲན་འདི་དང་འབྲེལ་བ་ཡི།།
ཆོས་གྲོགས་ཡོངས་ཀྱི་ཕྱིར་དུ་བཀོད། །
༢༠༡༨།༠༤།༢༡ ལ་གཟི་བརྗིད་མཐའ་ཡས་ཀྱིས།
དཔྱད་གཏམ་སྤེལ་མཁན་ལ་གསལ་བརྡ།