བོད་ལུགས་གསོ་རིག་གི་ཐུན་མོང་མིན་པའི་དཔྱད་ལྔའི་ལག་ལེན།
དཔྱད་ཀྱི་ལག་ཆའམ་ཆ་བྱད།
བོད་ལུགས་གསོ་རིག་ནི་བོད་རིགས་མི་དམངས་ཚོས་དུས་ཡུན་རིང་པོའི་ནང་ནད་རིགས་སྣ་ཚོགས་དང་འཐབ་རྩོད་བྱས་པའི་ཉམས་མྱོང་ཐོག་མི་རིགས་གཞན་གྱི་གསོ་རིག་ལེགས་ཆ་ཡང་བླངས་ནས་རྒྱུན་ཆད་མེད་པར་འཕེལ་རྒྱས་བཏང་བས་ད་ཆ་འཛམ་གླིང་ཡོངས་ཀྱིས་དོ་སྣང་བྱེད་པའི་རིག་གཞུང་གི་མ་ལག་ཆ་ཚང་བའི་གསོ་རིག་གི་གཞུང་ལུགས་ཤིག་ཏུ་གྲུབ་པ་མ་ཟད། ཀླད་སྐྱོན་སྙིང་ནད་དང་། རྩ་དཀར་གྱི་ནད། གཅོང་ནད་བཅས་ལ་མཆོག་ཏུ་སྨན་པའི་ཐོག་ཆ་བྱད་དཔྱད་ཀྱི་ལག་ལེན་ཏེ། གཏར་བཅད་སྲེག་གསུམ་གྱི་ལག་ལེན་ནི་དེང་གི་གཤག་བཅོས་རིག་པའི་ནུས་པ་དང་མཚུངས་པ་མ་ཟད། ཕྱི་ལུགས་དང་ཀྲུང་ལུགས་གསོ་རིག་གང་ལ་ཡང་མེད་པའི་ནད་བཅོས་ཀྱི་ལག་ལེན་ཁྱད་དུ་འཕགས་པ་ཞིག་ཡོད། དཔྱད་ནི་ལུས་ཀྱི་ཕྱི་ནས་ནད་ཀུན་འབྱིན་པ་དང་། ཞི་བར་བྱེད་པ་གང་ཡིན་དཔྱད་ཡིན་ཞེས་པ་ལྟར་ཐབས་དང་རིག་པར་བརྟེན་ནས་ཕྱི་རོལ་ནས་ནད་གཞི་འཐེན་པའི་ཐབས་མཆོག་ཅིག་ཡིན། དཔྱད་ཀྱི་བཅོས་ཐབས་ལ་རྣམ་གྲངས་བཅུ་ཡོད་ཅིང་། ནད་དུས་ཀྱི་དབང་ནས་བརྗོད་ན་ཟུང་རྔུ་འབྱིན་པ་སོགས་ཐོག་མར་དཔྱད་དུ་ཞུགས་པ་དང་། སྐྲན་འཇུ་འབྱིན་བྱེད་པ་སོགས་བར་དུ་དཔྱད་བཅོས་བྱེད་པ། རེངས་འཁུམས་འདོན་པ་སོགས་མཐའ་མར་དཔྱད་ལ་ཞུགས་པ་བཅས་ཡིན། དཔྱད་ནི་ཚ་གྲང་ནད་ཀྱི་འཕེལ་ཟད་ནད་རྐྱེན་དངོས་ལུས་ཀྱི་བ་སྤུ་དང་གསང་མིག་གི་གནས་ནས་ཕྱིར་འཐེན་པར་བྱེད་པའི་དུགས་ལུམས་བྱུག་གསུམ་དང་ཆ་བྱད་དེ། དཔྱད་ཀྱི་དམིགས་བསལ་ལག་ཆར་བརྟེན་ནས་ཤ་རུས་དོན་སྣོད་ཀྱི་གནས་སུ་གཞི་ཚུགས་པའི་ནད་རྐྱེན་དངོས་ཕྱིར་འདོན་པར་བྱེད་པའི་གཏར་བསྲེག་སོགས་ལུས་ཀྱི་འབྱུང་བ་མ་སྙོམས་པ་ལུས་ཀྱི་ཕྱི་ནས་སྙོམས་པར་བྱེད་པའི་བོད་ལུགས་གསོ་རིག་གི་སྲོལ་རྒྱུན་སྨན་བཅོས་བྱ་ཐབས་ཐུན་མོང་མིན་པ་ཞིག་ཡིན། དེར་འཇམ་རྩུབ་ཀྱི་དབྱེ་བ་དང་ལྡན་ཏེ། ཇི་ལྟར་རིག་ན་དེ་ལྟར་དཔྱད་དེ་བསྟེན་ནས་ནད་རྣམས་ཕྱིར་འབྱིན་པ་དང་། དཔྱད་བྱེད་དུས་ཟུག་རྔུ་མེད་ན་འཇམ་པ། ཟུག་རྔུ་དང་བཅས་པས་རྩུབ་པ། སྟོབས་ལྡན་མྱུར་བས་དྲག་པོ་དང་བཅས་གསུམ་ཡོད། དེར་འཇམ་པའི་དཔྱད་ལ་དུགས་དང་། ལུམས། བྱུག་པ་བཅས་གསུམ་ཡོད་པ་དང་། རྩུབ་པོའི་དཔྱད་ལ་གཏར་དང་། བསྲེག དབུག་པ་བཅས་གསུམ། དེ་བཞིན་དྲག་པོའི་དཔྱད་ལ་འདྲལ་བ་དང་། གཅོད་པ། འདྲུད་པ། འབྱིན་པ་བཞི་བཅས་ཁྱོན་དཔྱད་ལ་རྣམ་པ་བཅུ་ཡོད། དེ་མིན་རྩུབ་དཔྱད་དང་དྲག་དཔྱད་གཉིས་ལ་རྩུབ་དཔྱད་དུ་འབོད་པ་དང་། དུགས་ལུམས་བྱུག་གསུམ་ལ་འཇམ་དཔྱད་ཅེས་དཔྱད་ལ་སྤྱིའི་དབྱེ་བར་འཇམ་རྩུབ་གཉིས་སུ་ཕྱེ་གི་ཡོད།
ཡོང་ཁུངས། སྤེན་ནག་འཕྲིན་སྟེགས།
Leave a Reply