དེ་ཡང་། འཇིག་རྟེན་འདིར་སྲོག་ལྡན་གྱི་སེམས་ཅན་བྱུང་ནས་བཟུང་སྟེ་ཡངས་པའི་ས་གཞི་ཆེན་པོ་འདི་ཁོ་ན་ལ་རྟེན་བཅས་ཤིང་། འདི་ཁོ་ནས་སྲོག་ལྡན་རྣམས་འཚོ་ཞིང་སྐྱོང་བར་བྱས། ང་ཚོས་རང་རང་གི་ཁང་ཁྱིམ་ལ་གསོ་སྐྱོང་དང་བདག་གཅེས་བྱེད་ཀྱང་དེ་ནི་ཇི་ཙམ་རིང་ཡང་མི་རབས་ཁ་ཤས་ཀྱི་སྡོད་ཁང་ཙམ་ཡིན། ཡངས་པའི་ས་ཆེན་པོ་འདི་ནི་འདས་པའི་མེས་པོ་གྲངས་མེད་པ་དག་གི་འཚོ་གནས་བྱེད་སའི་གཞི་བྱས་ཟིན་ལ། མ་འོངས་པའི་ང་ཚོའི་རྗེས་རབས་པ་གྲངས་དང་མཐའ་མེད་པ་ཞིག་གི་འཚོ་གནས་ཀྱི་རྟེན་གཞི་
ཡང་འདི་ཁོ་ན་ཡིན། དེས་ན་རང་གི་སྡོད་ཁྱིམ་ལས་ལྷག་པ་ཞིག་ཁོར་ཡུག་ལ་གཅེས་སྤྲས་མ་ཐུབ་ཀྱང་གང་ཐུབ་ཀྱིས་བདག་གཅེས་དང་སྲུང་སྐྱོང་དགོས་པ་ནི་ང་ཚོ་ས་གཞི་འདི་ལ་བརྟེན་ནས་གནས་པའི་སྲོག་ལྡན་ཞིག་ཡིན་པའི་ངོས་ནས་ཆེས་གཞི་རྩའི་འོས་འགན་དེ་ཡིན། གལ་སྲིད་ས་གཞི་ཆེན་པོ་འདི་ལོངས་སྤྱོད་རྒྱུ་ཙམ་ལས་སྲུང་སྐྱོབས་ཀྱི་འདུ་ཤེས་གཏན་ནས་མེད་ན་ཁྱོད་ནི་ཕ་མེས་ལ་གུས་བསྐུར་མེད་པའི་ཁྲེལ་མེད་དང་། ཕྱི་རབས་པར་སེམས་ཁུར་མེད་པའི་ཀླད་མེད། དྲིན་ཆེན་ལ་དྲིན་དུ་མི་སེམས་པའི་མ་རབས་ཀྱི་མཐར་ཐུག་པ་ཞིག་ཅི་ལ་མིན།
མ་ཟད་མདོ་དབུས་མཐོ་སྒང་གི་ཁོར་ཡུག་འདི་ནི་ས་གོ་ལ་ཡོངས་ཀྱི་འཕྲུལ་ཆས་ཀྱི་ལྟེ་བའམ་ཨ་མ་ལྟ་བུ་ཡིན་ཏེ། འདི་ལ་གནོད་སྐྱོན་ཆེན་པོ་བྱུང་ཚེ་གོ་ལ་ཧྲིལ་པོ་ལ་ཉེན་ཁ་ཆེན་པོ་འཕྲད་པར་འགྱུར་ཞིང་འདི་ལ་སྲུང་སྐྱོང་བྱས་ཚེ་གོ་ལ་ཧྲིལ་པོ་ལ་སྲུང་སྐྱོབས་བྱས་པར་འགྱུར་ལ། 
གོ་ལ་ཧྲིལ་པའི་སྐྱེ་འགྲོ་ཡོངས་ལ་ཞབས་ཞུ་སྒྲུབ་པར་བྱས་པ་ཡང་ཡིན། དེས་ན་མིའི་རིགས་ཀྱི་ཆེས་མཐའ་མཇུག་གི་དག་ཞིང་འདི་མིའི་རིགས་ཡོངས་ཀྱི་ཆེད་དུ་ངེས་པར་དུ་སྲུང་སྐྱོབས་བྱེད་པར་འོས། ཆོས་ཕྱོགས་ནས་ཀྱང་། སྟོན་པ་སངས་རྒྱས་དང་པོར་སྐུ་འཁྲུངས་དུས་ཤིང་ལྗོན་པའི་དྲུང་དུ་འཁྲུངས། བར་དུ་སངས་རྒྱས་དུས་ཤིང་ལྗོན་པའི་དྲུང་དུ་སངས་རྒྱས། མཐར་མྱ་ངན་ལས་འདས་དུས་ཤིང་ལྗོན་པའི་དྲུང་དུ་མྱ་ངན་ལས་འདས། ཉིད་ཀྱི་རྗེས་འཇུག་དགེ་སློང་དག་ལ་ཐ་ན་རྩ་སྔོན་པོ་ཉག་མ་གཅིག་བཅད་ན་ཡང་འདུལ་ཁྲིམས་དང་འགལ་བར་གསུངས་ཤིང་། སྤང་ལྗོངས་དང་ཆུ་ཀླུང་དུ་མི་གཙང་བ་འདོར་དུ་མི་རུང་བ་དང་། 
ས་ལ་དོན་མེད་དུ་རི་མོ་འབྲི་བ་ཙམ་ཡང་ཡོངས་སུ་དགག་པར་མཛད་པ་ཡིན། དེས་ན། སྐྱེ་འགྲོ་ཡོངས་ལ་བྱམས་པའི་སེམས་ཉེ་བར་བཞག་སྟེ། ཁོར་ཡུག་ལ་གཅེས་པར་བྱ། སྐྱེ་འགྲོ་ཡོངས་ལ་བརྩེ་བའི་སེམས་ཉེ་བར་བཞག་སྟེ། ཁོར་ཡུག་ལ་བྱམས་པར་བྱ། སྟོན་པ་སངས་རྒྱས་ཀྱི་བཀའ་རྗེས་སུ་དྲན་པར་བྱས་ཏེ། ཁོར་ཡུག་ལ་སྲུང་སྐྱོབས་བྱ། འདི་ནི་འཇིག་རྟེན་མི་ཆོས་དང་མཐུན་པ་ཡིན་ཞིང་། 
འདི་ནི་དམ་པ་ལྷ་ཆོས་ཀྱི་དགོངས་པའང་ཡིན། དོན་གྱི་དགོས་པ་འདི་ལྟ་བུར་གཟིགས་ནས། རྫ་ས་སྐྱ་མཆོག་སྤྲུལ་ངག་དབང་སངས་རྒྱས་འཕྲིན་ལས་བསྟན་པའི་རྒྱལ་མཚན་ནམ། ༧ སྤྲུལ་བཀྲ་ཤིས་མགོན་པོ་མཆོག་ནས་ལོ་རེ་བཞིན་དམངས་སྒོར་ཁྲི་ཕྲག་གི་འགྲོ་གྲོན་ཆེད་གཏོང་གིས་གོ་ལར་གཅེས་སྐྱོང་དང་ཁོར་ཡུག་སྲུང་སྐྱོབས་ཆེད་སྡོང་འཛུགས་ནགས་གསོའི་བྱེད་སྒོ་ཆེན་པོ་སྤེལ་བཞིན་པ་ལྟར། འདི་ལོར་ཡང་ཉེར་ལྔའི་དུས་ཆེན་དང་བསྟུན་ཏེ་རང་གི་གདན་ས་རྫ་ས་སྐྱ་དགོན་གྱི་ཡུལ་དགོན་མཉམ་འབྲེལ་གྱིས་སྡོང་འཛུགས་ནགས་གསོའི་བྱེད་སྒོ་རྒྱ་ཆེར་སྤེལ་ཡོད་ཅིང་། བྱེད་སྒོའི་ནང་དུ་སྐྱ་སེར་བརྒྱ་ཕྲག་བརྒལ་བ་མཉམ་ཞུགས་བྱས་ཡོད་ལ། ནགས་ཚལ་གྲངས་བརྒྱ་ཕྲག་ལྔ་ཙམ་བཙུགས་ཡོད་པ་རེད། ༢༠༡༨/༥/༩
བོད་ཡུལ་ནས་མཁོ་སྤྲོད་གནང་བྱུང་།
Leave a Reply