འདི་ནི་ལུང་གི་ཆོས་ཐམས་ཅད་ལ་བྱ་སྟེ། ཆོས་ཀྱི་ཕུང་པོ་སྟེ་ཆགས་སོགས་ཉོན་མོངས་པ་བརྒྱད་ཁྲི་བཞི་སྟོང་རེ་རེའི་གཉེན་པོར་སངས་རྒྱས་ཀྱིས་གསུངས་པ་རྣམས་ལྷན་གཅིག་ཏུ་སྤུངས་པའི་ཕུང་པོའོ།། ཆོས་ཀྱི་ཕུང་པོ་དེ་ལ་བརྒྱད་ཁྲི་དང་བརྒྱད་ཁྲི་བཞི་སྟོང་དུ་བཞེད་པ་སོགས་སྡེ་བ་ཁ་ཅིག་བཞེད་པ་མི་འདྲ་བ་ཡང་ཡོད་དོ།།
སྤྱིར་ལུང་གི་ཆོས་ཐམས་ཅད་ལ་ཆོས་ཀྱི་ཕུང་བོ་ཞེས་བྱ་སྟེ། བརྗོད་བྱ་དོན་དང་རྗོད་བྱེད་ཀྱི་ཚིག་དུ་མ་སྤུངས་པའི་ཕུང་བོར་སྣང་བའི་ཕྱིར་ཡིན་ནོ།། ཆོས་ཀྱི་ཕུང་བོ་ལ་བརྒྱད་ཁྲི་དང་བརྒྱད་ཁྲི་བཞི་སྟོང་གི་བཞེད་ཚུལ་གཉིས་ལས། ཁ་ཆེ་བྱེ་བྲག་སྨྲ་བ་ལ་སོགས་པས། ཆོས་ཀྱི་ཕུང་བོ་བརྒྱད་ཁྲི་དག གང་རྣམས་ཐུབ་པའི་གསུངས་དེ་དག་ཅེས་པའི་མཛོད་ཀྱི་ཚིག་དང་མཐུན་པར་བརྒྱད་ཁྲི་ལས་བརྒྱད་ཁྲི་བཞི་སྟོང་གི་རྣམ་བཞག་ཁས་མི་ལེན་ཀྱང་སྡེ་བ་ཁ་ཅིག་བརྒྱད་ཁྲི་བཞི་སྟོང་དུ་འདོད་པའང་ཡོད་པར་གསུངས་ལ། ཐེག་ཆེན་པ་རྣམས་ནི་ཆོས་ཕུང་བརྒྱད་ཁྲི་བཞི་སྟོང་ལས་བརྒྱད་ཁྲིའི་རྣམ་བཞག་མི་བྱེད་དེ། ཇི་སྐད་དུ་ཐུབ་པ་ཆེན་པོས་ཆོས་ཕུང་པོ།། བརྒྱད་ཁྲི་བཞི་སྟོང་གསུངས་པ་ལས།། ཞེས་པ་ལྟར་ཁས་ལེན་ནོ།། ཆོས་ཀྱི་ཕུང་པོ་རེ་རེའི་ཚད་ལ་འདོད་ཚུལ་མང་ཡང་། མངོན་པ་གོང་མ་ལྟར་ན་ཚེག་བར་སུམ་ཅུ་སོ་གཉིས་ལ་ཤོ་ལོ་ཀ་གཅིག དེ་སྟོང་དུ་ལོངས་པ་ན་ཆོས་ཕུང་ཚད་དུ་འཇོག་པ་དང་མངོན་པ་འོག་མ་ལྟར་ན་གླང་པོ་ཆེ་རབ་བརྟན་གྱིས་ཐེག་ཙམ་གྱི་སྣག་ཚས་ཆོས་ཀྱི་ཕུང་པོ་གཅིག་འབྲི་བར་ནུས་པའི་ཚད་ཕུང་པོ་རེར་བརྩི་བ་སོགས་ཡོད་པ་ལས། སྤྱིར་ཆགས་སོགས་ཉོན་མོངས་པ་བརྒྱད་ཁྲི་བཞི་སྟོང་རེ་རེའི་གཉེན་པོར་ཆོས་ཕུང་རེ་རེ་བསྟན་ཅིང་རང་རང་གི་གཉེན་པོའི་བྱ་བ་ཡོངས་སུ་རྫོགས་པའི་གཏམ་གྱི་ཚོགས་ལ་ཆོས་ཀྱི་ཕུང་པོ་ཞེས་བྱ་སྟེ། མཛོད་ལས་སྤྱོད་པ་རྣམས་ཀྱི་གཉེན་པོར་ནི།། ཆོས་ཀྱི་ཕུང་པོ་མཐུན་པར་གསུངས།། ཞེས་པ་ལྟར་རོ།།
དེ་ལྟར་ཆོས་ཕུང་བརྒྱད་ཁྲི་བཞི་སྟོང་གི་འབྱེད་ཚུལ་ཡང་རང་གྲོལ་དབང་དྲག་རྒྱ་མཚོའི་ཞལ་ནས། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ཡང་། ཉོན་མོངས་བརྒྱད་ཁྲི་བཞི་སྟོང་གི་གཉེན་པོར་གསུངས་པ་སྟེ། དེ་ཡང་རྩ་བ་འདོད་ཆགས་ལས་གྱུར་བའི་ཉོན་མོངས་པ་ཉིས་ཁྲི་ཆིག་སྟོང་གི་གཉེན་པོར་འདུལ་བ་ཉིས་ཁྲི་ཆིག་སྟོང་དང་རྩ་བ་ཞེ་སྡང་ལས་གྱུར་བའི་ཉོན་མོངས་པ་ཉིས་ཁྲི་ཆིག་སྟོང་གི་གཉེན་པོར་མདོ་སྡེ་ཉིས་ཁྲི་ཆིག་སྟོང་། རྩ་བ་གཏི་མུག་ལས་གྱུར་བའི་ཉོན་མོངས་པ་ཉིས་ཁྲི་ཆིག་སྟོང་གི་གཉེན་པོར་མངོན་པ་ཉིས་ཁྲི་ཆིག་སྟོང་། རྩ་བ་དུག་གསུམ་ཆ་མཉམ་པ་ལས་གྱུར་བའི་ཉོན་མོངས་པ་ཉིས་ཁྲི་ཆིག་སྟོང་གི་གཉེན་པོར་ཡོ་ག་ཉིས་ཁྲི་ཆིག་སྟོང་གསུངས་སོ་ཞེས་གསུངས།
ཡོང་ཁུངས། བྱམས་བརྩེའི་སྤྱི་སྟེགས།
དུག་གསུམ་ཆ་མཉམ་པའི་གཉེན་པོར་ཡོ་ག་ཞེས་པའི་སྐབས་ཀྱི་ཡོ་ག་དང་དུག་གསུམ་ཆ་མཉམ་པ་ཞེས་པ་དེ་ག་འདྲས་ཟེ་དོན་འབྲེལ་བྱེད་དགོས་མེད་ཐད་འགྲེལ་བཤད་འཕར་མ་རེ་གནང་རོགས་ཞུ།
མཁྱེན་ལྡན་བསོད་ཤར་ལགས་འཚམས་འདྲི་དང་སྦྲགས་སྐུ་ཉིད་ཀྱིས་རྒྱུན་ལྡན་ངེད་རྒྱལ་ཡོངས་ས་ཆེན་དྲྭ་བའི་སྟེང་པེབས་གཟིགས་ཞིབ་གནང་བར་ངས་རྩོམ་སྒྲིག་ཡོངས་ཀྱི་ཚབ་བྱེད་དེ་སྙིང་དབུས་བཀའ་དྲིན་ཆེ་་ཞུ། སྐུ་ཉིད་ཀྱིས་དོགས་འདྲི་འདིར་སྤྱིར་བཏང་རྩོམ་པ་པོ་དེ་ཉིད་ཀྱིས་དགོངས་བཞེད་ཇི་ལྟར་ཡོད་མེད་མི་ཤེས་མོད། རད་དེ་ཆེད་རྩོམ་ནང་དུ་འདི་ལྟར་འདུག༼རྩ་བ་དུག་གསུམ་ཆ་མཉམ་པ་ལས་གྱུར་བའི་ཉོན་མོངས་པ་ཉིས་ཁྲི་ཆིག་སྟོང་གི་གཉེན་པོར་ཡོ་ག་ཉིས་ཁྲི་ཆིག་སྟོང་གསུངས་སོ་ཞེས་གསུངས།༽ འདིའི་ནང་དུ་ཡོ་ག་ཞེས་པའི་གོ་དོན་ནི་རྣལ་འབྱོར་ལ་གོ་དགོས་པར་སྣང་། དེ་ཡང་ཡོ་ག་སྟོད་ལུགས་དང་ཡོ་བ་སྨད་ལུགས་ཞེས་པའི་དོ་ཡང་རྣལ་འབྱོར་པའི་བརྒྱུད་རིམ་ལ་གོ། ཡོ་གའི་རྒྱུད་ཡང་གཙོ་ནང་གི་སེམས་སྒོམ་དེ་སྟོན་པ་སྟེ་རྣལ་འབྱོར་གྱི་རྒྱུད་ཡིན། སྦྱོང་བྱ་དང་སྦྱོང་བྱེད་སོགས་རྣལ་འབྱོར་སྒོམ་སྒྲུབ་ལ་རྟེན་ནས་སེམས་རྒྱུད་ཉོན་རྨོངས་གསུམ་ཞི་ཐབས་ཡིན་པས་བདེ་བ་ཆེན་པོ་བྱང་ཆུབ་སེམས་རྨད་དུ་བྱུང་བའི་ལེའུ་ཞེ་གཉིས་ལས་གསུངས་བཞིན་ནོ། གསང་སྔགས་ལུང་གི་བང་མཛོད་ལས། རྣལ་འབྱོར་གྱི་རྒྱུད་ལ་ཡོ་གའི་རྒྱུད་ཀྱི་ཆོས་འཁོར་ལོ་གསངས་བའོ་བདག་པོས་ཞུས་སོགས་གསུངས་པར་གཞིགས་ན་ཡོ་གའམ་རྣལ་འབྱོར་གྱིས་སྦྱོར་སྒྲུབ་ལ་རྟེན་ནས་སེམས་བརྒྱུད་ཀྱི་ཉོན་རྨོངས་ཞི་ནས་ཐར་པར་དོན་གཉེར་བྱེད་དེ་སངས་རྒྱས་ཐོབ་པར་སྙམ། དེ་ཡང་རྩོམ་པ་པོས་དགོངས་བཞེད་ཇི་ལྟར་ཡིན་མིན་མི་ཤེས་མོད ཁོ་བོས་འཆར་སྣང་ཙམ་ལས་མ་འདས་པར་ཤེས་དགོས།