སྒ་སྟོན་རྡོ་རྗེ་འཆང་འཇམ་མགོན་ངག་དབང་ལེགས་པ་རིན་པོ་ཆེ་ནི་བོད་ཡུལ་མདོ་ཁམས་འབྲི་ཟླ་ཟལ་མོ་སྒང་གི་ཆར་གཏོགས་སྒ་སྨད་འཛིན་མདའ་ཞེས་པའི་གྲོང་དུ།རབ་བྱུང་བཅུ་བཞི་པའི་ཤིང་ཕོ་བྱི་བའི་ལོར༡༨༦༤སྐུ་བལྟམས།སྐུ་ཆུང་ངུའི་དུས་ནས་དམ་པའི་རིགས་སད་དེ་འཇམ་མགོན་མཁྱེན་ཀོང་རྣམ་གཉིས་གཙོས་རིས་མེད་ཀྱི་མཁས་གྲུབ་མང་པོ་བསྟེན་ཏེ་གསུང་ངག་ལམ་འབྲས་སོགས་ལ་གསན་བསམ་གྱིས་སྒྲོ་འདོགས་བཅད།དགུང་ལོ་སོ་བདུན་ནས་བགྲང་བྱ་བཅུ་དྲུག་རིང་ལ་མཚམས་སྒོ་འདག་སྦྱར་མཛད་ནས་དཀའ་སྤྱད་དྲག་པོས་གསུང་ངག་ལམ་འབྲས་བསྒོམས་པས་ས་དང་པོའི་རྟོགས་པ་མངོན་དུ་མཛད།དགུང་ལོ་ང་བདུན་ནས་གཞན་དོན་དུ་གསུང་ངག་འཆད་སྤེལ་དང་རྟེན་གསུམ་བཞེངས་པ་སོགས་རྣམ་དཀར་གྱི་མཛད་པ་བཟང་པོས་སྐལ་ལྡན་གྱི་སློབ་བུ་གྲངས་ལས་འདས་པ་སྨིན་གྲོལ་ལ་བཀོད།དེ་ལྟར་བཤད་སྒྲུབ་ལས་གསུམ་གྱི་མཛད་པ་མཐར་ཕྱིན་ནས་དགུང་གྲངས་དོན་བརྒྱད་པ་རབ་བྱུང་བཅུ་དྲུག་པའི་ལྕགས་སྦྲུལ་༡༩༤༡ལོའི་ནག་པ་ཟླ་བའི་ཚེས་ཉེར་དགུ་ཉི་མ་ཕྱེད་ཡོལ་ཙམ་དུ་ངོ་མཚར་བའི་ལྟས་དུ་མ་དང་བཅས་ནུབ་ཕྱོགས་བདེ་བ་ཅན་དུ་གཤེགས་སོ།།

རྗེས་དྲན་དད་པའི་མཆོད་སྤྲིན།

གང་གི་རྣམ་ཐར་དྲན་པ་ཙམ་གྱིས།།
མ་བཅོས་ཤུགས་འབྱུང་དད་གུས་ཀློང་ནས།།
སྐྱབས་གསོལ་རེ་བསྐུལ་གདུང་འབོད་ཞུ་ཡུལ།།
སྒ་སྟོན་ཆོས་རྗེར་སྙིང་ནས་འདུད་དོ།།

སྔོན་སྦྱངས་བག་ཆགས་སད་པའི་སྟོབས་ཀྱིས།།
ཆུང་ངུའི་དུས་ནས་དམ་པའི་ངང་ཚུལ།།
བཀའ་གདམས་གོང་མའི་ལམ་བཟང་སྙེགས་མཁན།།
འཇམ་མགོན་ལེགས་པས་ཐུགས་རྗེས་གཟིགས་མཛོད།།

མཚན་ལྡན་བླ་མ་བཅུ་ཕྲག་ཙམ་ཞིག།
མཉེས་པ་གསུམ་གྱིས་ཚུལ་བཞིན་བསྙེན་ནས།།
ཟབ་དོན་མན་ངག་གཏེར་དུ་བཞེས་མཁན།།
ཆོས་རྗེ་ངག་དབང་ལེགས་པ་མཁྱེན་ནོ།།

ཆོས་ཀྱི་ཕྱིར་དུ་གཅེས་སྲོག་འདོར་ཡང་།།
ཇི་མི་སྙམ་པའི་དཀའ་སྤྱད་དྲག་པོས།།
འཕགས་པའི་རྟོགས་པ་མངོན་དུ་བརྙེས་པའི།།
འཇམ་མགོན་བླ་མར་སྙིང་ནས་དད་དོ།།

རྒྱལ་བས་བསྔགས་པའི་དབེན་པའི་སུལ་དུ།།
གསང་ཆེན་རྣལ་འབྱོར་སྒྲུབ་ལ་གཞོལ་བས།།
འཁོར་འདས་དབྱེར་མེད་གནད་གསང་རྟོགས་མཛད།།
རྡོ་རྗེ་འཆང་ཆེན་བླ་མ་མཁྱེན་ནོ།།

ཆོས་བཞིན་མཛད་པས་ཆོས་སྲུང་འགོ་ཞིང་།།
གྲུབ་མཐའ་སྙོགས་པས་ཀུན་གྱིས་བཀུར་བས།།
རྡོ་རྗེ་འཆང་ཞེས་གྲགས་པ་དོན་ལྡན།།
ངག་དབང་ལེགས་པས་བྱིན་གྱིས་རློབས་ཤིག།།

མ་དག་འཁོར་བའི་དུག་མཚོའི་ཀློང་ནས།།
ལས་ཉོན་རྦ་རླབས་དྲག་ཏུ་འཁྲུགས་དུས།།
སྐྱབས་དང་དཔུང་གཉེན་གཅིག་པུར་གྱུར་པ།།
འཇམ་མགོན་ཁྱེད་ལས་སུ་ཞིག་མཆིས་སམ།།

སྐྱབས་སུ་མཆི་འོ་དཔལ་ལྡན་བླ་མས།།
མི་མངོན་བདེ་ཆེན་དག་པའི་ཞིང་ནས།།
ཐུགས་རྗེའི་ཕྱག་ཟུང་རིང་དུ་བརྐྱངས་ནས།།
མྱུར་དུ་ཞིང་དུ་འདྲེན་པར་མཛོད་ཅིག།།

ཅེས་པ་འདི་ནི་མེ་སྒ་སྟོན་རྡོ་རྗེ་འཆང་གི་དགོངས་རྫོགས་དུས་དྲན་གྱི་ཉིན་མོ་དེར་མཁས་གྲུབ་ནས་གུས་པས་སྦྱར་བའོ།།