༈ །བདེ་བ་ཅན་གྱི་སྨོན་ལམ་ནི།
༈ །རྗེ་བཙུན་བླ་མ་ཐུགས་རྗེ་ཆེན་པོ་དང་ལྡན་པ་རྣམས་ལ་ཕྱག་འཚལ་ལོ། །མི་མཇེད་ཞིང་གི་སྟོན་པ་རྫོགས་སངས་རྒྱས། །ཤཱཀྱའི་རྒྱལ་པོའི་འཁོར་ཚོགས་རྒྱ་མཚོ་ལ། །སངས་རྒྱས་ཞིང་གི་བསྔགས་པ་བརྗོད་རྣམས་ལས། །མཆོག་གྱུར་བདེ་བ་ཅན་ལ་གུས་ཕྱག་འཚལ། །ཞིང་དེའི་དབུས་སུ་རིན་ཆེན་ལྗོན་པའི་དྲུང་། །ལྷ་མིའི་སྟོན་པ་འདྲེན་མཆོག་འོད་དཔག་མེད། །པདྨ་རཱ་གའི་ལྷུན་པོ་ལྟར་བརྗིད་ཅིང་། །འོད་ཟེར་བྱེ་བས་བརྒྱན་ལ་གུས་ཕྱག་འཚལ། །ཚངས་པའི་དབྱངས་ཀྱིས་འདུས་པའི་ཚོགས་རྣམས་ལ། །ཐེག་མཆོག་སྟོན་ཚེ་ཏིང་འཛིན་གྱིས་མྱོས་པའི། །དགྲ་བཅོམ་རྣམས་ཀྱང་དམན་པའི་སེམས་སྤངས་ནས། །བྱང་ཆུབ་མཆོག་ཏུ་སྦྱོར་མཛད་ལ་ཕྱག་འཚལ། །སྣ་ཚོགས་སྤྲུལ་པས་སྐད་ཅིག་རེ་རེ་ཞིང་། །སྣ་ཚོགས་ཞིང་གི་མགོན་མེད་འགྲོ་རྣམས་ལ། །སྣ་ཚོགས་མཛད་པས་ཕན་བདེ་ཀུན་སྩོལ་བའི། །ཕྲིན་ལས་བསམ་མི་ཁྱབ་ལ་གུས་ཕྱག་འཚལ། །སྤྱན་རས་གཟིགས་དང་མཐུ་ཆེན་ཐོབ་ལ་སོགས། །སྲས་བཅས་རྒྱལ་བ་ནམ་མཁའི་གཏོས་གང་ཞིང་། །ཉན་ཐོས་དགེ་འདུན་རྒྱ་མཚོའི་རྡུལ་སྙེད་ཀྱི། །གྲངས་དང་མཉམ་པའི་འཁོར་ཚོགས་ལ་ཕྱག་འཚལ། །རྣལ་འབྱོར་དབང་ཕྱུག་བརྩེ་ཆེན་ས་སྐྱ་པ། །བརྒྱུད་པར་བཅས་པའི་ཡོངས་འཛིན་རྒྱ་མཚོའི་ཚོགས། །རྣམ་མང་དགེ་ཚོགས་རྣམ་དག་སྨོན་ལམ་མཐུས། །ཞིང་དེར་བརྫུས་ཏེ་འཁྲུངས་ལ་མགོས་ཕྱག་འཚལ། །བདག་གཞན་དུས་གསུམ་བསགས་པའི་དགེ་ཚོགས་དང་། །རྩ་བརྒྱུད་བླ་མའི་ཐུགས་རྗེའི་བྱིན་རླབས་དང་། །འོད་དཔག་མེད་མགོན་ཐུགས་བསྐྱེད་རྒྱ་མཚོའི་མཐུས། །བདག་དང་སྲིད་མཚོར་འཁྱམས་པའི་འགྲོ་བ་རྣམས། །ནམ་ཞིག་ཚེ་འདིའི་སྣང་བ་ནུབ་པའི་ཚེ། །སངས་རྒྱས་ཀུན་གྱིས་བསྔགས་པའི་ཞིང་གི་མཆོག །བདེ་བ་ཅན་ཞེས་གྲགས་པ་དེར་སྐྱེས་ནས། །འོད་དཔག་མེད་པའི་ཞལ་མཆོག་མཐོང་བར་ཤོག །མཐོང་མ་ཐག་ཏུ་གསུང་དབྱངས་རྒྱ་མཚོ་ལས། །ཟབ་ཅིང་རྒྱ་ཆེའི་ཐེག་མཆོག་ཐོས་གྱུར་ནས། །དད་དང་ཤེས་རབ་གཟུངས་དང་ཏིང་འཛིན་སོགས། །ཡོན་ཏན་ཚོགས་ཀྱིས་བདག་རྒྱུད་གང་བར་ཤོག །རང་ལུས་ཞིང་གི་རྡུལ་སྙེད་སྤྲུལ་པ་ཡིས། །སྐད་ཅིག་རེ་རེར་ཕྱོགས་བཅུའི་ཞིང་བགྲོད་ནས། །ཀུན་ཏུ་བཟང་པོའི་མཆོད་སྤྲིན་རྒྱ་ཆེན་གྱིས། །སངས་རྒྱས་སྲས་བཅས་མ་ལུས་མཆོད་པར་ཤོག །སླར་ཡང་དག་པའི་ཞིང་དེར་མགོན་པོ་དང་། །འདྲེན་མཆོག་བླ་མའི་ཚོགས་རྣམས་མཆོད་བྱས་ནས། །ཐེག་ཆེན་ཆོས་ཚུལ་ཟབ་མོ་ལེགས་ཐོབ་སྟེ། །བྱང་ཆུབ་སྤྱོད་པ་མ་ལུས་མཐར་ཕྱིན་ཤོག །སྙིང་རྗེས་མ་དག་ཞིང་གི་འགྲོ་རྣམས་ལ། །སོ་སོའི་ཡིད་བཞིན་འདོད་དགུས་ཚིམ་བྱས་ཏེ། །སྐལ་བ་ཇི་བཞིན་ཐེག་པ་གསུམ་བསྟན་ནས། །རྣམ་གྲོལ་ཐར་པའི་ལམ་དུ་འཇུག་པར་ཤོག །ནག་ཞིག་གོ་འཕང་དམ་པ་མངོན་གྱུར་ཚེ། །འཁོར་དུ་བསྡུས་ནས་ཐེག་མཆོག་བསྟན་པ་ཡིས། །བྱང་ཆུབ་སྤྱོད་པའི་ས་ལ་བཞག་བྱས་ནས། །སངས་རྒྱས་ཡེ་ཤེས་མཆོག་ལ་འགོད་པར་ཤོག །རྒྱལ་བ་འཇིག་རྟེན་དབང་ཕྱུག་ཞབས་འབྲིང་དུ། །ཆོས་ཀྱི་འབྱུང་གནས་ཞེས་བྱའི་དགེ་སློང་གིས། །སངས་རྒྱས་ཞིང་གི་བཀོད་པ་བཟུང་བ་ལྟར། །སྣོད་བཅུད་དག་པའི་ཞིང་བཟང་ཐོབ་པར་ཤོག །རབ་དགའི་སར་གནས་རྒྱལ་བའི་སྲས་རྣམས་ཀྱིས། །དགོངས་པ་གཅིག་ཏུ་བཏབ་པའི་སྨོན་ལམ་མཆོག །བཟང་པོ་སྤྱོད་པའི་སྨོན་ལམ་ཇི་ལྟ་བར། །བདག་དང་འགྲོ་བས་མྱུར་དུ་འགྲུབ་པར་ཤོག ། ཅེས་པ་འདི་ནི་འདུན་ཅིང་སྨོན་པའི་གནས་ཐོབ་པར་བྱ་བའི་ཆེད་དུ། ཤཱཀྱའི་དགེ་སློང་བསོད་ནམས་སེང་གེས་ཐུབ་བསྟན་རྣམ་པར་རྒྱལ་བའི་ཆོས་གྲྭ་ཆེན་པོར་སྦྱར་བའོ།།
Leave a Reply