བསྔོ་བ་བསྡུས་པ་དང་། གསུང་ངག་ལམ་རིམ་རྒྱུད་ལ་སྐྱེ་བའི་སྨོན་ལམ

ཆོས་སྤྱོད་དཀར་ཆག

སྭསྟི། བདག་དང་གཞན་གྱི་དུས་གསུམ་དགེ་བའི་ཚོགས། །དཔག་མེད་མ་ལུས་གཅིག་ཏུ་བསྡོམས་པའི་མཐུས། །རྩ་བརྒྱུད་བླ་མ་རྒྱལ་བ་སྲས་བཅས་ཀྱི། །ཟག་མེད་ཐུགས་ཀྱི་དགོངས་པ་ཡོངས་རྫོགས་ཤོག །དམིགས་ཡུལ་འདི་དང་རིགས་དྲུག་ཐམས་ཅད་ཀྱི། །སྒྲིབ་གཉིས་བག་ཆགས་བཅས་པ་ཀུན་སྦྱངས་ནས། །བསོད་ནམས་ཡེ་ཤེས་ཚོགས་གཉིས་རབ་བསགས་ཏེ། །རྣམ་མཁྱེན་སྐུ་བཞིའི་དབང་ཕྱུག་མྱུར་ཐོབ་ཤོག །ཁྱད་པར་རྣལ་འབྱོར་བདག་ཅག་འཁོར་བཅས་ཀྱི། །ཚེ་འདིའི་རྒུད་པ་མ་ལུས་ཞི་བ་དང་། །བསམ་དོན་ཆོས་དང་མཐུན་པ་ལེགས་གྲུབ་ནས། །སྲིད་ཞིའི་ཕུན་ཚོགས་རྒྱས་པའི་བཀྲ་ཤིས་ཤོག །ཅེས་པ་འདི་ནི་འབར་ར་བ་དགེ་བསྙེན་གཅོད་པ་བཀྲ་ཤིས་ཀྱིས། མཆོད་བསྔོ། ཤི་བསྔོ། གསོན་བསྔོ་རྣམས་ཤིན་ཏུ་བསྡུས་པ་ཞིག་དགོས་ཞེས་བསྐུལ་བའི་ངོར། བཙུན་པ་དཔལ་ལྡན་དོན་གྲུབ་ཀྱིས་བྲིས་པའོ།།  ༈ །གསུང་ངག་རིན་པོ་ཆེའི་ལམ་རིམ་རྒྱུད་ལ་སྐྱེ་བའི་སྨོན་ལམ་བཞུགས་སོ།། ༈ །ན་མོ་གུ་ར་ཝེ། ཕུན་ཚོགས་དགེ་ལེགས་ཀུན་འབྱུང་དྲིན་ཅན་རྗེ། །ཕུལ་བྱུང་མཚན་དཔེའི་དཔལ་འབར་རྡོ་རྗེ་འཆང་། །ཕས་རྒོལ་ཚར་གཅོད་མཐུ་སྟོབས་དབང་ཕྱུག་ཞབས། །ཕན་བདེའི་ལམ་སྟོན་རྗེ་བཙུན་ས་སྐྱ་པ། །བརྒྱུད་པར་བཅས་པའི་མཁྱེན་བརྩེའི་སྤྱན་རས་ཀྱིས། །བུ་གཅིག་པ་ལ་བརྩེ་བའི་མ་བཞིན་དུ། །རྣལ་འབྱོར་བདག་ལ་རྒྱུན་དུ་ལེགས་གཟིགས་ནས། །ཡིད་ལ་སྨོན་པའི་གནས་འདི་འགྲུབ་པར་མཛོད། །སྣང་གསུམ་གྱི་མ་དག་པའི་ཉེས་དམིགས་ནི། སྲིད་གསུམ་འཁོར་བ་མཐའ་མེད་འགྲོ་བ་རྣམས། །སྡུག་བསྔལ་འདུ་བྱེད་འགྱུར་བའི་སྡུག་བསྔལ་གྱིས། །རྒྱུན་དུ་གཙེས་ཤིང་བདེ་བའི་སྐབས་མེད་པར། །ངེས་འབྱུང་དྲག་པོ་གཏིང་ནས་སྐྱེ་བར་ཤོག །དལ་འབྱོར་རྙེད་དཀའ་ནི། ལེགས་བརྒྱས་བསྒྲུབས་པའི་ལུས་རྟེན་ཕུན་ཚོགས་འདི། །རྙེད་པར་དཀའ་ཞིང་འཇིག་པར་སླ་བ་ཡི། །རང་བཞིན་རྟོགས་ནས་སྐད་ཅིག་གཡེལ་མེད་པར། །དལ་རྟེན་ལུས་ལ་སྙིང་པོ་ལེན་པར་ཤོག །ལས་རྒྱུ་འབྲས་ནི། ཀུན་རྫོབ་འཁྲུལ་པའི་བདེ་སྡུག་སྣང་བ་རྣམས། །སྔོན་བསགས་ལས་ཀྱི་རྗེས་སུ་འབྲང་བ་ཡི། །ལས་འབྲས་བསླུ་བ་མེད་པའི་ཚུལ་རྟོགས་ནས། །དགེ་སྡིག་བླང་དོར་ཚུལ་བཞིན་བྱེད་པར་ཤོག །ཉམས་ཀྱི་སྣང་བ་སྨོན་པ་བྱང་ཆུབ་ཀྱི་སེམས་ནི། སྡུག་བསྔལ་རྒྱ་མཚོར་དྲིན་ཆེན་ཕ་མ་རྣམས། །ལས་ཀྱི་ཆུ་བོ་ཆེན་པོས་ཁྱེར་མཐོང་ནས། །བཅོས་མིན་བྱམས་དང་སྙིང་རྗེས་དྲངས་པ་ཡི། །བྱང་ཆུབ་སྨོན་པའི་སེམས་མཆོག་བསྐྱེད་པར་ཤོག །འཇུག་པ་བྱང་ཆུབ་ཀྱི་སེམས་ནི། ཐེག་ཆེན་ལམ་གྱི་རྩ་བ་ཚུལ་ཁྲིམས་གསུམ། །བདག་གཞན་མཉམ་དང་བརྗེ་བའི་བྱང་ཆུབ་སེམས། །ཕ་རོལ་ཕྱིན་དྲུག་བསྡུ་དངོས་བཞི་ལ་སོགས། །རྒྱ་ཆེན་བྱང་ཆུབ་སྤྱོད་ལ་འཇུག་པར་ཤོག །དོན་དམ་བྱང་ཆུབ་ཀྱི་སེམས་ནི། རྩེ་གཅིག་གཡོ་བ་མེད་པའི་ཞི་གནས་དང་། །གནས་ལུགས་འཁྲུལ་མེད་རྟོགས་པའི་ལྷག་མཐོང་གཉིས། །ཟུང་འཇུག་ཆུ་བོའི་རྒྱུན་ལྟར་བསྒོམས་པ་ཡིས། །དངོས་འཛིན་འཁྲུལ་པའི་དྲི་མ་སེལ་བར་ཤོག །དག་པའི་སྣང་བ་ནི་འབྲས་བུའི་སྐབས་སུ་འབྱུང་བས་འདིར་མ་བཀོད། མདོ་སྔགས་ཀྱི་མཚམས་སྦྱོར་ནི། ཕ་རོལ་ཕྱིན་དྲུག་ལམ་གྱིས་རྒྱུད་སྦྱངས་ནས། །བརྒྱུད་པ་སྐལ་ལྡན་རྒྱུད་དོན་མ་ལུས་རིག །སྙིང་རྗེར་ལྡན་ཞིང་དམ་ཚིག་མཆོག་སྲུང་བའི། །རྡོ་རྗེ་སློབ་དཔོན་ཚུལ་བཞིན་མཉེས་བྱེད་ཤོག །སྨིན་བྱེད་ཀྱི་དབང་ནི། དེ་སོགས་མཚན་ཉིད་ཀུན་ལྡན་བླ་མ་ཡིས། །རང་ལུས་གཞིར་གནས་དཀྱིལ་འཁོར་རྣམ་བཞི་ལ། །རྨད་བྱུང་ཆོ་གས་དབང་བཞི་བསྐུར་བ་ཡིས། །ལམ་བཟང་བཞི་ཡི་སྣོད་དུ་འགྱུར་བར་ཤོག །དབང་གི་དམ་ཚིག་ནི། དབང་ལས་ཐོབ་པའི་དམ་ཚིག་སྡོམ་པའི་ཚོགས། །སྲོག་དང་བསྡོས་ཏེ་ཚུལ་བཞིན་བསྲུང་བ་ཡིས། །འགལ་རྐྱེན་ཉེས་ཚོགས་མཐའ་དག་རབ་བཅོམ་ནས། །སྔགས་ཀྱི་ལམ་རྣམས་འགྲུབ་པའི་གཞིར་གྱུར་ཤོག །ལྟ་བ་ནི། ཕྱི་ནང་དངོས་ཀུན་རང་སེམས་སྣང་བ་ཙམ། །སེམས་ནི་ངོ་བོ་ཉིད་མིན་སྒྱུ་མ་བཞིན། །དེ་ཡང་སྤྲོས་པའི་མཐའ་དང་བྲལ་བ་ཡི། །དབང་གིས་མཚོན་པའི་ལྟ་བ་རྟོགས་པར་ཤོག །ཕྱི་བསྐྱེད་རིམ་ནི། ཐོག་མེད་འཁོར་བའི་བག་ཆགས་ཀྱིས་བསླད་པའི། །མ་དག་འཁྲུལ་པའི་སྣོད་བཅུད་སྣང་བ་རྣམས། །ཐབས་ལ་མཁས་པས་ལྷག་པའི་ལྷར་བསྒོམས་པས། །རྟེན་དང་བརྟེན་པའི་འཁོར་ལོར་འཆར་བར་ཤོག །ནང་བསྐྱེད་རིམ་ནི། མ་བཅོས་ལྷུན་གྱིས་གྲུབ་པའི་ལུས་ཀྱི་རྩ། །གདན་གསུམ་ཚང་བའི་སྐུ་རུ་བསྒོམས་པ་ཡིས། །རྩ་རླུང་རྒྱལ་བས་བྱིན་གྱིས་བརླབས་བྱས་ནས། །བུམ་དབང་གི་ལྟ་བ་ནི། སྣང་སྟོང་ཟུང་འཇུག་ཡེ་ཤེས་སྐྱེ་བར་ཤོག །གསང་དབང་གི་ལམ་རླུང་དང་གཏུམ་མོ། སྣ་ཚོགས་ཀུན་རྟོག་སྐྱེད་བྱེད་ལས་ཀྱི་རླུང་། །སྦྱོར་བ་བདུན་གྱི་དབང་དུ་བྱས་པ་ཡིས། །གཏུམ་མོའི་མེ་དྲོད་ཕྱོགས་མེད་རབ་སྦར་ནས། །ལྟ་བ་ནི། གསལ་སྟོང་ཟུང་འཇུག་ཡེ་ཤེས་སྐྱེ་བར་ཤོག །གསུམ་པའི་ལམ་ནི། ལས་ཀྱི་ཕྱག་རྒྱ་དངོས་སམ་ཡེ་ཤེས་ལ། །འདུ་ཤེས་གསུམ་ལྡན་སྦྱོར་བས་སྙོམས་ཞུགས་ནས། །ཡས་བབས་དགའ་བ་བཞི་ཡི་རིམ་གྱིས་ནི། །ལྟ་བ་ནི། བདེ་སྟོང་ཟུང་འཇུག་ཡེ་ཤེས་སྐྱེ་བར་ཤོག །བཞི་པའི་ལམ་ནི། ལུས་དང་ངག་གི་རྦ་རླབས་དབང་གྱུར་ནས། །ཏིང་འཛིན་སེམས་ཀྱི་རྦ་རླབས་གསུམ་བསྒོམས་པས། །གཟུང་འཛིན་གཉིས་ཀྱི་རྦ་རླབས་རེངས་པ་ཡིས། །ལྟ་བ་ནི། བདེ་སྟོང་མཆོག་གི་ཡེ་ཤེས་སྐྱེ་བར་ཤོག །འདུས་པ་གསུམ་མཐར་ཕྱིན་ནས་འཕགས་པའི་ལམ་གྱི་མཚམས་སྦྱོར་ནི། དེ་ལྟར་རིམ་གཉིས་བསམ་གཏན་བསྒོམས་པ་ལས། །རང་ལུས་དག་ལ་ཉམས་གསུམ་སྐྱེས་པ་ཡིས། །འདུས་པ་གསུམ་གྱི་ལམ་རྣམས་མཐར་ཕྱིན་ནས། །པད་ཅན་ལུང་བསྟན་སྤྲུལ་སྐུའི་ཞལ་མཐོང་ཤོག །གྲུབ་མཐའ་སྙོགས་ཏེ་བླ་མ་ན་འཕོ་བ་ན། གྲུབ་མཐའ་རེ་རེ་ལ། །བླ་མ་གང་ལ། དབང་གང་བླང་། དཀྱིལ་འཁོར་གང་གནས་གྱུར། ཡོན་ཏན་གང་ཐོབ། གྲུབ་མཐའ་གང་སྙོགས་པ་སྟེ་ལྔ་ལྔ་ཡོད་པ་ལས། གྲུབ་མཐའ་དང་པོ་ལྔ་ནི། སྣ་ཚོགས་སྤྲུལ་སྐུར་དབང་བཞི་བླངས་པ་ཡིས། །ཡན་ལག་བདུན་གྱི་རྩ་རྣམས་མངོན་གྱུར་ནས། ཡོན་ཏན་བརྒྱ་ཕྲག་བདུན་གྱིས་བརྒྱན་པ་ཡི། །འཁོར་འདས་དབྱེར་མེད་གྲུབ་མཐའ་སྙོགས་པར་ཤོག །གྲུབ་མཐའ་གཉིས་པའི་ལྔ་ནི། ཟུང་འཇུག་ལོངས་སྐུར་དབང་བཞི་བླངས་པ་ཡིས། །ཡི་གེ་བྷ་གའི་དཀྱིལ་འཁོར་མངོན་གྱུར་ནས། །རིགས་དྲུག་སོ་སོའི་སྐད་དུ་ཆོས་སྟོན་པའི། །མ་འདྲེས་ཡོངས་རྫོགས་གྲུབ་མཐའ་སྙོགས་པར་ཤོག །གྲུབ་མཐའ་གསུམ་པའི་ལྔ་ནི། བདེ་ཆེན་ཆོས་སྐུར་དབང་བཞི་བླངས་པ་ཡིས། །གསང་བ་བདུད་རྩིའི་དཀྱིལ་འཁོར་མངོན་གྱུར་ནས། །ཉི་ཁྲི་ཆིག་སྟོང་རྒྱུ་བ་འགགས་པ་ཡིས། །བདེ་སྟོང་ཆུང་ངུའི་གྲུབ་མཐའ་སྙོགས་པར་ཤོག །གྲུབ་མཐའ་བཞི་པའི་ལྔ་ནི། དབྱེར་མེད་སྐུ་ལས་དབང་བཞི་བླངས་པ་ཡིས། །ཀུན་ཁྱབ་རླུང་གི་དཀྱིལ་འཁོར་མངོན་གྱུར་ནས། །རྣམ་ཐར་གསུམ་གྱི་འབྲས་བུས་བརྒྱན་པ་ཡིས། །བདེ་སྟོང་ཆེན་པོའི་གྲུབ་མཐའ་སྙོགས་པར་ཤོག །ཉེ་རྒྱུས་འབྲས་བུར་མཚམས་སྦྱོར་བ་ནི། བཅུ་གཉིས་ས་ཐོབ་ཕྱག་རྒྱའི་བྷ་གར་ནི། །དུས་གསུམ་བདེ་གཤེགས་བཅུད་འདུས་ཐིག་ལེ་ལས། །འབྲས་དུས་དབང་གི་ཆུ་བོ་བླངས་པ་ཡིས། །གཙུག་ཏོར་མཆོག་ཏུ་འགྲོས་བཞི་ཐིམ་པར་ཤོག །འབྲས་བུ་ལ་གསུམ་ལས། རང་དོན་གྱི་ཆེ་བ་ནི། རྟེན་དང་བརྟེན་པ་སྐུ་ལྔར་གནས་གྱུར་ཅིང་། །གཞན་དོན་གྱི་ཆེ་བ་ནི། སྣ་ཚོགས་གདུལ་བྱའི་འདོད་རྒུའི་དཔལ་འབྱོར་སྐོང་། །བདག་གཞན་གཉིས་ཀའི་ཆེ་བ་ནི། བདག་གཞན་མཉམ་དུ་མངོན་པར་འཚང་རྒྱ་བའི། །དཔག་ཡས་ཡོན་ཏན་ཚོགས་ལ་དབང་འབྱོར་ཤོག །གོ་འཕང་མཆོག་དེ་མ་ཐོབ་དེ་སྲིད་དུ། །ཀུན་མཁྱེན་བླ་མའི་དྲུང་དུ་བདག་སྐྱེ་ཞིང་། །ཉིད་ཐུགས་བརྩེ་བ་ཆེན་པོས་རྗེས་བཟུང་སྟེ། །ལམ་བཟང་འདི་དོན་བསྒོམས་པའི་སྐལ་ལྡན་ཤོག །ཚེ་འདི་ཉིད་ལའང་འགལ་རྐྱེན་ཀུན་སྤོངས་ཤིང་། །དམ་པས་བསྔགས་པའི་མཐུན་རྐྱེན་ཀུན་ཚང་ནས། །མདོ་རྒྱུད་རྒྱ་མཚོའི་དགོངས་པ་མཐར་ཕྱིན་ནས། །བདེ་གཤེགས་བསྟན་པ་ཕྱོགས་བཅུར་རྒྱས་བྱེད་ཤོག །དྲིན་ཆེན་བླ་མ་རྣམས་ཀྱི་བྱིན་རླབས་དང་། །སྐྱབས་ཆེན་དཀོན་མཆོག་གསུམ་གྱི་བདེན་པ་དང་། །དཔལ་ཆེན་ཆོས་སྐྱོང་སྲུང་མའི་ནུས་མཐུ་ཡིས། །རླབས་ཆེན་སྨོན་ལམ་འདི་དག་མྱུར་འགྲུབ་ཤོག །ཅེས་ལམ་འབྲས་བུ་དང་བཅས་པའི་ལམ་གྱི་རིམ་པ་རྣམས་རྒྱུད་ལ་སྐྱེ་བར་སྨོན་ལམ་འདེབས་པ་འདི་ནི་རྗེ་བཙུན་བླ་མ་རྣམས་ཀྱི་བྲན་དུ་གྱུར་པ་དགེ་སློང་རྒྱལ་ཁམས་པ་སེང་གེའི་མཐའ་ཅན་གྱིས་སྦྱར་བའོ།།  །།  ༈ །རྒྱལ་བའི་བསྟན་པ་ཕྱོགས་བཅུར་རྒྱས་པ་དང་། །རྒྱལ་སྲས་རྣམས་ཀྱི་སྨོན་ལམ་འགྲུབ་པ་དང་། །རྒྱལ་ཁམས་ཀུན་ཏུ་དཔལ་འབྱོར་ཕུན་ཚོགས་རྣམས། །རྒྱལ་བས་བསྔགས་པ་ཇི་བཞིན་འབྱོར་གྱུར་ཅིག །དགེ་འདུན་ཐམས་ཅད་རྣམ་དཀར་ཚུལ་ཁྲིམས་ལ། །ལེགས་པར་གནས་ཤིང་ཐོས་དང་བསམ་ལྡན་པས། །ཞི་ལྷག་ཟུང་འབྲེལ་རྣལ་འབྱོར་བསྒོམ་པའི་མཐུས། །རྟོགས་པའི་ཡོན་ཏན་འཕེལ་ཞིང་རྒྱས་པར་ཤོག །ཡི་གེ་འབྲི་མཆོད་སྦྱིན་པ་ལ་སོགས་པ། །ཆོས་སྤྱོད་རྣམ་བཅུས་བསྟན་དང་འགྲོ་བའི་དོན། །ཚུལ་བཞིན་བསྒྲུབས་པས་སྐྱེ་དགུས་མཆོད་གྱུར་ཏེ། །ཆོས་དད་དགེ་ལེགས་ཕྱོགས་བཅུར་རྒྱས་པར་ཤོག །སྲས་བཅས་རྒྱལ་བས་འགྲོ་བའི་དོན་སླད་དུ། །རྒྱ་ཆེན་སྨོན་ལམ་རྣམ་མང་བཏབ་པ་ལྟར། །བདག་ཀྱང་ལྷག་བསམ་དག་པས་ཚུལ་བཞིན་འདེབས། །འགྲོ་བའི་དོན་ཕྱིར་མྱུར་དུ་འགྲུབ་པར་ཤོག །སངས་རྒྱས་ཕྲིན་ལས་འགྲོ་ལ་འཇུག་པ་དང་། །ཆོས་དབྱིངས་མཁའ་ལྟར་ཀུན་ལ་ཁྱབ་པ་དང་། །ཀུན་རྫོབ་རྟེན་འབྲེལ་བསླུ་བ་མེད་པའི་མཐུས། །རྒྱ་ཆེན་སྨོན་ལམ་འདི་དག་མྱུར་འགྲུབ་ཤོག། །། ཀུན་མཁྱེན་བསོད་ནམས་སེང་གེས་གསུངས་པའོ།།