ན་མོ་ཤཱཀྱ་གུ་རུ་མུ་ན་ཡེ།
ངུ་བྲོ་བ་དང་པོ།༽ ངུ་བྲོ་བ་གསུམ་ནི་ཁྱིམ་དེའི་བུད་མེད་ཁྲེལ་མེད་ཁྲོ་གཏུམ་ཅན་ཞིག་ཡིན་པས། ཉིན་ཞིག་འབྲི་དང་མཛོ་མོའི་འོ་མ་བཞོ་དགོས་བྱུང་བས། འདམ་རྫབ་ཏུ་ཁྱིམ་དེའི་བུད་མེད་ཀྱི་བཞོན་སྟེགས་ལ་བཞུགས་དགོས་བྱུང་བས། ཁོང་གི་ཐུགས་ལ་བདག་རྒྱ་གར་དུ་ཡོད་སྐབས་མཁས་དགུའི་གཙུག་ཏུ་བཀུར་ཏེ་པཎྜི་ཏ་མང་པོ་དང་ལྷན་དུ་ཆོས་ཀྱི་དགའ་སྟོན་ལ་རོལ་ནས་ཡོད་མོད། ད་ལྟ་བོད་དུ་བསླེབས་ན་བུད་མེད་ཀྱི་སྟེགས་སུ་འདུག་དགོས་ཏེ་ཞེས་ངུ་བྲོ་བ་དང་པོ་བྱུང་།
ངུ་བྲོ་བ་གཉིས་པ།༽ ཉིན་མོར་ར་ལུག་འཚོ་བའི་ཚེ། ཁོང་རྣལ་འབྱོར་བ་རྟེན་འབྲེལ་ལ་མངའ་བརྙེས་པ་ཡིན་པས་རྡེའུ་འགའ་ར་ལུག་གཡས་སུ་སོང་ཚེ་གཡོན་དུ་བཀྲམ། གཡོན་དུ་སོང་ཚེ་གཡས་སུ་བཀྲམ་ཞིང་ཕྱོགས་གཅིག་ཏུ་བསྡུས་པས་ཆོག་ལ། ནང་དུ་རྡེའུ་ནག་པོ་རེ་བྱུང་ན་སྤྱང་ཀི་འོང་བའི་རྟགས་ཡིན། དེ་ཉིད་སོར་མོས་མནན་ན་སྤྱང་ཀི་འོང་མི་ནུས། ཁྱིམ་དུ་སླར་ལོག་ནས་མཚན་མོ་ཡང་བཞུགས་ལོང་མེད་པར་ཁྱིམ་དེའི་ཡོས་འཐག་དགོས་པས། ལན་གཅིག་གཉིད་དུ་སོང་སྟེ་མཆི་གུའི་སྟེང་དུ་དབུ་བརྒྱབས་པ་ན། བུད་མེད་དེས་ཡོས་མ་འཕོ་ཨང་ཟེར་བ་དང་། ཁོང་གིས་རང་གི་མགོ་དང་ཡོས་གཉིས་ཀྱི་གལ་ཆེ་བ་ཡོས་རེད་གསུངས་ནས་ངུ་བྲོ་བ་གཉིས་པ་བྱུང་།
ངུ་བྲོ་བ་གསུམ་པ།༽ ཉིན་ཞིག་ར་ལུག་གི་རྫི་བོར་སོང་ནས་བཞུགས་ཡོད་སྐབས། བྱ་ཁྲུང་ཁྲུང་ཞིག་གླག་གིས་བསད་ནས་བྱའི་རོ་ཁོང་གི་པང་དུ་ལྷུང་བས་ཁྱོད་ཀྱང་ས་མཐའི་བྱ་། ང་ཡང་ས་མཐའི་མི། ངེད་གཉིས་ཀྱི་ལས་འདི་ཅི་འདྲའི་སྡུག་པོ་ཞིག་རེད་ཨང་གསུངས་ནས་ངུ་བྲོ་བ་གསུམ་པ་བྱུང་།
དགོད་བྲོ་བ་དང་པོ།༽ ཁོང་ར་ལུག་གི་རྫི་བོར་སོང་བའི་ཉིན་ཞིག་ནམ་ཟླ་ཧ་ཅང་གྲང་བས་མེ་ཕུང་གཅིག་བསྐྱིལ་ནས་བཞུགས་སྐབས། རི་བོང་ཞིག་ཀྱང་ཁོང་ལ་མི་འཛེམ་པར་མེ་ལ་ལྡེས་ཏེ་བསྡད། དར་གཅིག་གཉིད་ཁུགས་སྟེ་མགོ་བོ་མེ་ཕུང་གི་ནང་དུ་ཉུག་པར་བྱས་པས་གདོང་གི་ཁ་སྤུ་ཚིག་ནས་ཕྱོགས་ཕྱོགས་སུ་རྒྱུག་པ་མཐོང་བས་དགོད་བྲོ་བ་དང་པོ་བྱུང་།
དགོད་བྲོ་བ་གཉིས་པ།༽ ཉིན་ཞིག་ར་ལུག་འཚོ་ཞོར་དུ་མཚོ་ཁ་ཞིག་་ལ་བཞུགས་སྐབས། མཚོ་དེར་གནས་པའི་ཀླུ་ཞིག་གིས་ཁོང་མཁས་པ་ཆེན་པོར་ཤེས་ནས་བུད་མེད་ཡིད་དུ་འོང་བ་ཞིག་ཏུ་སྤྲུལ་ཏེ། རི་དྭགས་གཉན་གྱི་རྭ་ཅོ་ཞིག་ཏུ་འོ་མ་བླུགས་ནས་བསྣམས་ཡོད་པ་སར་བཞག ཐོག་མར་ཕྱག་འཚལ་ཏེ་འབུལ་དགོས་སྙམ་པའི་བར་ལ་རྭ་ཅོ་འདྲིལ་ཏེ་འོ་མ་ཐམས་ཅད་ས་ལ་བོ་སོང་བས་། ཀླུ་དེ་ངོ་ཚ་སྟེ་ཕྱིར་བཀྱེད་ནས་སྤྲུལ་བ་ཡང་མ་བསྡུས་པར་མཚོ་ནང་དུ་ལྷུང་བས་དགོད་བྲོ་བ་གཉིས་པ་བྱུང་།
དགོད་བྲོ་བ་གསུམ།༽ ཉིན་ཞིག་ཁོང་རྫི་བོ་བྱེད་པའི་ཚེ། རྒྱ་གར་ན་བཞུགས་དུས་ཀྱི་གཞུང་སྡེ་སྣོད་གསུམ་ལ་ཐོས་བསམ་སྒོམ་གསུམ་བྱས་པའི་ལུང་རྟོགས་ཀྱི་ཡོན་ཏན་རྣམས་བར་སྐབས་སུ་བརྗེད་ཡོད་ལོས་ཆེ་སྙམ་དུ་དཔྱོད་པ་ལ་བཞུགས་པས། ཡོན་ཏན་གྱི་ནོར་བུ་རྣམས་གཅིག་ཀྱང་མ་བརྗེད་པར་ཐུགས་ལ་གསལ་བས་དགོད་བྲོ་བ་གསུམ་པ་བྱུང་ངོ་།།
Leave a Reply