༄༅། །དཔལ་ལྡན་ས་སྐྱ་༧གོང་མ་ངག་དབང་ཐེག་ཆེན་དཔལ་འབར་བསམ་འཕེལ་ཕྲིན་ལས་དབང་གི་རྒྱལ་པོར་མཆོད་ཚིག་དད་པའི་ང་རོ་ཞེས་བྱ་བ། 
རྒྱལ་བ་བཅོམ་ལྡན་འདས་ཀྱིས། །
བསྔགས་ཡུལ་མཚན་མཆོག་གསུམ་གྱི། །
དཔལ་ལྡན་ས་སྐྱའི་གདུང་རྒྱུད། །
གུས་པས་ཕྱག་གསུམ་འཚལ་ལོ། །
ས་དཀར་རྒྱལ་བའི་བསྟན་ལ། །
ས་བོན་སེམས་པ་དཀར་བའི། །
ས་ཆེན་གོང་མ་རྣམ་ལྔའི། །
ས་རྒྱུད་གོང་མ་མཁྱེན་ནོ། །
གདོང་ལ་དོད་པ་འཛུམ་རེད། །
ངག་ནས་འཐོར་བ་ཆོས་རེད། །
ཡིད་ཀྱི་སེམས་པ་བྱམས་རེད། །
ས་དཀར་བསྟན་པའི་གཙུག་རེད། །
འཆད་པས་གདུལ་སེམས་འདུལ་སོང་། །
རྩོད་པས་ང་རྒྱལ་ཡིབས་སོང་། །
རྩོམ་པས་གཞན་ཡིད་བཅོམ་སོང་། །
དཔལ་ལྡན་བླ་མ་མཁྱེན་ནོ། །
ཐོས་པས་རྨོངས་མུན་སྤྱུགས་ཤིང་། །
བསམ་པས་སོམ་ཉི་གཅོད་ཅིང་། །
སྒོམ་པས་སེམས་རྒྱུད་གྲོལ་བའི། །
བརྩེ་ལྡན་གོང་མ་མཁྱེན་ནོ། །
མཁྱེན་པ་ཤེས་བྱའི་གནད་ཀུན། །
བརྩེ་བས་སེམས་ལྡན་ཀུན་གཟིགས། །
ནུས་པས་ཐར་བའི་ལམ་དྲོངས། །
རྒྱལ་བ་གོང་མ་མཁྱེན་ནོ། །
ལྟ་བ་མཁའ་ལྟར་ཡངས་པ། །
སྒོམ་པ་ཟེའུ་འབྲུ་རྒྱས་པ། །
སྤྱོད་པ་ཚུལ་ལུགས་མཐུན་པའི། །
བླ་མའི་བླ་མ་མཁྱེན་ནོ། །
ལྷ་གཅིག་ཕྱག་ན་པདྨོ། །
ལུགས་གཉིས་སྲོག་ལྟར་གཅེས་པ། །
སྲིད་གསུམ་བསྟན་འགྲོའི་མགོོན་པོ། །
ཨ་ཡུར་བཛྲ་མཁྱེན་ནོ། །
ཕྱི་ལ་གངས་སེང་འགྱིང་འདྲ། །
ནང་ལ་དྲི་མས་སྟོང་པ། །
གསང་བ་སྔགས་ཀྱི་རྒྱལ་པོ། །
ཞབས་པད་ཡུན་རིང་བརྟན་ཤོག །
གཞན་ཕན་བྱང་སེམས་འཁྲུངས་པའི། །
རྒྱལ་སྲས་ཨ་ཡུར་བཛྲ། །
སྐུ་ཚེ་མི་འགྱུར་བཞུགས་ཤིང་། །
ཕྲིན་ལས་ཕྱོགས་མཐར་ཁྱབ་ཤོག །
སྐྱེ་བ་འདི་དང་གཞན་ཡང་། །
འཁོར་བ་མ་སྟོང་བར་དུ། །
དཔལ་ལྡན་ས་སྐྱ་གོང་མས། །
ཐར་པའི་ལམ་སྣ་དྲོངས་ཤིག །
ཅེས་ངལ་གསོ་དང་སྟབས་བསྟུན་ནས་སྟོད་ཕྱོགས་དཔལ་ལྡན་ས་སྐྱའི་གནས་མཆོག་རུ་ཆོས་མཇལ་སོང་བས་ཁ་འུ་བྲག་རྫོང་དུ་དད་མདངས་དཀར་པོས་སྣེ་དྲངས་སྟེ་མདོ་སྨད་འབྲི་རྒྱུད་རབ་བརྟན་པ་འཇམ་དབྱངས་སྦྱིན་པའམ་རབ་རྡོར་གྱིས་གསོལ་བ་རྩེ་གཅིག་ཏུ་བཏབ་ནས་བྲིས་པའོ། །
Leave a Reply