བསླུ་མེད་བདེན་པ་བདར་བས་ཐོལ་བྱུང་གིས་རྒོལ་ཚིག

བསླུ་མེད་བདེན་པ་བདར་བས་ཐོལ་བྱུང་གིས་རྒོལ་ཚིག

                ——  གདོང་མཁན་པས།  

༼དང་པོ།༽

འདས་སོང་དེབ་ཐེར་ལོ་རྒྱུས་ཤུལ་རྙིང༌ཁྲོད།།  

ཏྲེ་རབས་བརྒྱུད་འདྲེན་འཕྲང་དོག་སྲང་ལམ་ནས།། 

ཟླ་མེད་དཔའ་རྒོད་མིང་བྱང་གངས་ལྗོངས་སུ།། 

ཏྲེ་ཧོར་ཁམས་པ་ཞེས་པའི་ཁྱོན་འདིར་ལྡིར།། 

སྔོན་བྱོན་མཁས་གྲུབ་དག་གིས་ལོ་རྒྱུས་དབུས།། 

བརྡ་དང་ཐ་སྙད་སྦྱོར་སྤྱོད་མི་མཚུངས་ཀྱང་།། 

གནས་ལུགས་བྱུང་རབས་འབེལ་གཏམ་གསེར་ཕྲེང་ལས།། 

འགལ་འདུ་ལྟག་སྤྲོད་བཤད་ཡམ་ཡོད་མ་ཡིན།། 

གནའ་དེང་ཆོས་སྲིད་མངའ་བདག་མི་བོའི་སྐབས།། 

དུས་ཀྱི་འཕོ་འགྱུར་འཕེལ་འགྲིབ་མངོན་ན་ཡང་།། 

ཏྲེ་རབས་དཔའ་ཐུབ་དམ་པའི་འགྲན་ཟླ་ལས།། 

བརྡ་དང་ཐ་སྙད་སྦྱོར་ཚུལ་རྩོད་རྙོག་མེད།།  

རེད་དེ་དེང་སང་ཁྲེལ་མེད་མི་བུ་འགས།།   

སྔོན་བྱུང་ལོ་རྒྱུས་དག་ལ་འགལ་འཛོལ་དང་།། 

མ་དག་རྒྱུན་འབྱམས་ཡོད་ཚུལ་བསྙད་པ་འདིར།། 

རྟོག་གེ་གདོང་མཁན་ཁོ་བོ་ལན་གཅིག་དགོད།། 

     གདོང་མཁན་པས་རྒྱ་གར་བྱང་ཤར་ས་ལུ་རྒ་རའི་མ་བསམ་མགྲོན་ཁང་ཁང་མིག ༢༡༢ ནང་ནས་ཤར་མ་བྲིས།  མཚན་མོའི་ཆུ་ཚོད ༩:༡༩ ལ། ཏྲེ་རྩོམ་གླིང་དུ་སྤེལ། ༢༠༡༨/༡༠/༡༩

༼གཉིས་པ།༽

སྔོན་བྱུང་ལོ་རྒྱུས་དག་ལས་ཐ་སྙད་ཐད།། 

ནོར་འཛོལ་འགལ་འབྲེལ་ཡོད་པར་ངས་མི་འདོད།། 

ཐ་སྙད་མི་འདྲའི་སྦྱོར་ཚུལ་ཡོད་པ་ཞེས།། 

གདོང་མཁན་མགྲིན་བཟང་ལམ་ནས་གདོད་ནས་བསྒྲགས།། 

ཡིན་ཡང་ཏྲེ་རབས་མི་རིགས་བརྒྱུད་གཞིས་འདིར།། 

སོག་པོ་སྐབས་དང་འགྲོ་མགོན་ཆོས་འཕགས་སྐབས།།  

འགལ་འཛོལ་བྱུང་རབས་བསྙད་ན་དགོད་མོའི་གནས།། 

ལོ་རྒྱུས་འཆད་ཀྱང་དཀའ་གནད་ཡེ་ནས་དབེན།། 

ཀྲེ་བོ་ཏྲེ་བོ་ཏྲེ་ཧོར་སྐྲེ་བོ་ཞེས།། 

ཚིག་སྦྱོར་ཐ་སྙད་རྗེས་མཐུན་མི་གཅིག་ཀྱང་།། 

དངོས་བྱུང་ལོ་རྒྱུས་དག་ལ་འགལ་འཛོལ་མེད།། 

ཧོར་ཚང་མ་བསམ་བུ་བརྒྱུད་ཁྱིམ་གཞིས་འདིར།། 

ཧོར་སེར་ད་ར་ཁག་ལྔའི་དཔོན་ས་དང་།། 

ཁམས་རིགས་ཏྲེ་པའི་ཡུལ་ལུང་བདག་དབང་འོག།  

རྫ་སྟོད་ག་ཡུ་འགོ་པ་མན་ཆད་དང་།། 

རྟའུ་ཉག་མཚོའི་སྡེ་པའི་ཡན་ཆད་བར།། 

ཏྲེ་ཧོར་ཁམས་པ་ཞེས་པའི་དབང་བསྒྱུར་འོག།  

དེབ་རྙིང་མང་དག་ཁྲོད་ནས་ལྷུན་ཆགས་གསལ།། 

རྗེས་སོར་གསར་སྐྱེས་སྨྱུག་འཛིན་དོན་གཉེར་ངོར།། 

འདས་སོང་ཇི་ལྟར་ལོ་རྒྱུས་མངོན་ན་རུང་།། 

ཚད་འཛིན་གནད་ལ་སྨིན་པའི་གདམས་ངག་ལས།། 

མཁས་སྤོབས་དྲེགས་པས་བཤད་ཡམ་ཉུང་ན་བཟང་།། 

གདོང་མཁན་མགྲིན་བཟང་ལམ་ནས་བསྐུལ་ལྕག་བསྲིངས།།

     ༢༠༡༨/༡༠/༡༩   ཆུ་ཚོད ༩:༢༥ མཚན་མོ།

༼གསུམ་པ།༽

གསར་རྟོགས་མི་བུའི་གཞན་ངོར་སྐུ་བསྟོད་ལ།།

དགའ་ཚོར་ནམ་ས་བཀང་བས་དགྱེས་ཚོར་དེར།།

མོས་ལྡན་ཀུན་བཟང་ཞིང་གི་རྒྱལ་སྲས་པས།།

མཁས་གྲུབ་དམ་པའི་ཐུགས་སུ་བཞད་གད་ཤོར།།

དེབ་ཐེར་གསེར་སྦྱངས་གཙང་མའི་གླེགས་བམ་ལས།།

ནོར་འཛོལ་ཡོད་ལུགས་དཀྲིགས་པའི་མོས་པར།།   

བྱིས་བརྒྱད་སེམས་ངོར་བདེན་པར་ཚོར་ན་ཡང་།།

མཁྱེན་གཉིས་གྲུབ་པའི་སྣང་ངོར་མི་འཚམས་པ།།

ཁ་སྤོབས་འུར་སྒྲོགས་བདེན་པར་སུ་ཡིན་ཚོར།།

རང་ཉིད་མཁས་དྲེགས་རྗེས་ཆགས་མི་གཏོང་བར།།

གཞན་གཡམ་བདེན་པ་མེད་ལུགས་བསྙད་པ་དེས།།

རང་རློམ་བདེན་སྒྲུབ་ཡིན་པར་རྩོད་མེད་གྲུབ།།

དེའི་ཕྱིར་ཇི་འདྲ་མཁས་བླུན་བགྲོ་གླེང་ལ།།

སྦོམ་ཚོད་ཐིག་གི་དམའ་ས་ལེགས་བཟུང་ནས།།

སྣ་ཚོགས་ཤེས་བྱའི་རྒྱུ་སྐར་འཆར་བ་ན།།

ལྔ་རིག་མཚར་སྡུག་ལང་ཚོའི་བསུང་ངད་ཐུབ།།

རྒྱ་བོད་གཙུག་ལག་ལྗོན་བཟང་ཟོས་པའི་དྲིས།།

དེང་སང་མཁས་བླུན་དབུས་སུ་ལྷུན་ངེར་བརྗིད།།

དེ་མིན་རྒྱུན་ཆགས་མཁས་སྤོབས་ངོམ་པ་དང་།།

རང་ཉིད་མ་གཏོགས་རྒྱ་བོད་གཞུང་ལུགས་ལ།།

ལེགས་བྱང་རྟོགས་པའི་བློ་གྲོས་མེད་མདོག་བཤད།།

གཏོལ་མེད་ཤོར་བའི་སྲིན་སྐད་སྒྲོགས་པ་དེས།།

མཁས་མང་རི་དྭགས་བྱེ་བའི་དཔའ་དུ་བརྗིད།།

དེའི་ཕྱིར་གྲོགས་བཟང་གདོང་མཁན་ཁོ་བོ་པས།།

ལོ་མང་རྒྱུས་ཡོད་མཁས་དབང་ཁྱེད་ཉིད་ལ།།

བདེན་གཏམ་ཆོས་ཀུན་གླུ་རུ་ལེན་པ་དེས།།

བདེན་གཏམ་ཧུབ་ཀྱིས་བཞེས་པའི་རེ་བསྐུལ་བགྱིས།།

        གདོང་མཁན་པས།  ༢༠༡༨/༡༠/༡༩  མཚན་མོ་ཆུ་ཚོད ༩:༤༥